好多童年回億，都係好貴。你細個睇過嘅動漫IP，就好似同California FITNESS簽咗約咁，除非間廠執咗，如果唔係你到50歲，可能都仲畀緊錢佢，養緊佢個IP。
話說近年成日俾人話垃圾嘅暴雪，有個Diablo系列出到第4集，去到第6季，我玩咗超過1200小時，真係要爆了，已經睇唔到佢有任何生存可能，想借個機會勸大家時間保貴，人生應該值得更多好Game。
就係因為，以前同朋友喺呢個系列入面一齊有美好回憶，所以就算大家都一把年紀，都肯花時間去玩。暴雪話出魔獸系列皮膚，就買魔獸系列皮膚，暴雪話出DLC，咁就立即去買DLC⋯⋯果10億美元營收，我同一位月入10幾萬嘅朋友，都有份貢獻。
月入10幾萬對暴雪啲客真係微不足道。身家可以一日内暴增超過2000億港元嘅Elon Musk，佢隻魂靈師職業，喺Cydiablo排名排緊24（之前試過13），既然有呢啲咁有錢嘅玩家，其實暴雪真係唔Care你個童年回憶，修Bug Update最緊要自己工程師覺得爽，Elon Musk OK，就OK啦。
Diablo 4隻Game剛出時，有過一段好玩階段，法師要靠操作先有高傷，死靈有血矛骨矛可以一擊必殺，所以衍生合作契機，其他隊友就掩護到主力出到大招。不過後來咁多季，開始變到跟Bug玩Game，所有最強流派其實都係Bug嚟，技能變化極少，去到DLC諗住暴雪認認真真改一次，所以即使玩咗5季都肯再俾錢，點知，都係睇Bug做人，一個職業可以打出「京」的傷害數字，不過其他所有職業仍然停留以億計算，差距之大叫人點享受遊戲？Elon Musk本來玩德魯伊同野蠻人，最後都屈服玩魂靈師玩Bug，Diablo 4可以令到Elon轉職業，其實呢點都係創舉嚟。
仲未計大量複製Bug，複製道具咁多季都繼續存在，似乎係官方默許？打寶遊戲任你複製，官方見第6季唔多掂，所以出緊季中更新，不過見到啲少修少補，應該都係無得救，見好多Youtuber都開始吹唔起Diablo 4了。
最近開始，一班朋友一見到Diablo 4 個LOGO已經覺得眼瞓，所以都無咩點玩，分別玩helldivers 2、MH、warhammer之類。POE2都就快出了，似乎Diablo 4已經為POE準備好起飛昇舞台，Diablo 4 就好似上將潘鳳咁，好快就會殞落。
Diablo 4現時嘅困境應該係結構性，結構性唔只話隻Game，而係整個團隊，團隊可以設計一個合作副本係（叫黑暗堡壘），所有玩家都只想打一次就收皮，呢項失敗都可以係創舉之一。
人大了，唔使買隻Game都話要唔食飯，但原來Game係無變得好玩，DQ3重製有DEI，星矢手遊大製作原來又係換皮Game，入到個副本，見到敵人3選1過關加強自己個玩法真係笑咗，最後有商店賣道具嘛，有玩手遊的都知道了；幻水系列又出隻千瘡百孔嘅JRPG，今時今日玩家活著真係苦，日日去Store睇有咩好玩，個世界到底發生咗咩事？
View this post on Instagram
討厭傲嬌雅典娜；《無雙大蛇》兩代全角色滿級嘅男人。近年沉迷足小遊戲，成立足小研究所。