手遊比起單機遊戲唔同嘅地方，就係通常會有周年慶典，佛心公司會回饋玩家，送下十抽劵同派下石，雖然不成文習慣最後都係要玩家課多幾嚿，但通常都係滿載而歸，唔會樂極生悲。

但係營運遊戲相當「出色」嘅日本公司 Klab，經營類似以紅白機足小指令玩法為賣點的《 足球小將DreamTeam》個5周年慶典，食正日本隊出線，原本可以賺到盡，點知竟然辣「㷫」玩家，令到唔少玩家在官方 Discord 同埋本港足小群爆出退款潮，就連有內地攻略網站 KOL 都帶頭杯葛，發布「Boycott CTDT」（captain tsubasa dream team） 宣言，要求 Klab 退款，到底發生何事？

事緣食正世界盃熱潮，《足球小將》又經常預言日本隊勝出，Klab 當然亦唔放過玩家這口「肥肉」，推出一個又一個新 Pool，例如日本贏西班牙，Klab 就咁巧合推出限定池「日本泰來 vs 西班牙天使」。

遊戲內角色，通常要5張齊「四突」（似龍珠DK「開四路」）先可以落場發揮真正實力，而要突破一張卡，通常要有泛用的「井出保」章，又或者同一角色的突章。

話說5周年「㷫」典，推出咗兩個突章包，玩家其實本來都好受落，都會買來突破新角色，但點知，Klab失誤將突章包變成「換角包」推出，憑突章可以換取新角不用抽，最搞笑係，連未推出嘅一個瑞典利雲池都可以換。

玩家當然開心，突章可換角色呢個消息當日下午瘋傳，有買咗第一個 pack 嘅玩家，決定買晒所有 Pack，而有好多平時唔課金嘅人都以為 Klab 咁佛心賀日本隊出線，出呢個 pack 大平賣。但點知， Klab 好快就話自己出錯咗，仲強行刪除玩家遊戲內的角色，完全無安排玩家退款。

《足球小將DreamTeam》玩到 5 年，完全只係因為指令玩法好玩，有童年回憶，而且呢隻可以配技能，不過有啲技能，可能來自另一隻抽咗幾千蚊嘅限定。

講返突章，唔少玩家已經將換來的角色升好，仲食埋之前啲限定技能，例如一隻新利雲，可能技能來自幾隻幾千蚊角色，但結果，就被 Klab 直接刪除，刪除咗之後，就連本來唔關突章事嘅技能都消失得無影無蹤，課金已落鹹水海。

Klab 初時維護時仲將一啲帳戶補底換取的球員也錯誤刪除，引起更大公憤，而且突然經歷長達超過 10 小時的維修時間，Discord 立即炎上。

玩家唔介意俾錢，咁嬲係因為，禮包係 Klab 自己失誤，卻「責任不在我方」，而且至今仍未有任何補償方案，有不少玩家根本不會買突章，見可以換角色先課，好多玩家因為 Klab 今次出錯而「破處」，但 Klab「中出即飛」，強行刪除真金白銀買來的角色，初時公告，仲話要在 23/12 才會視乎情況補回給玩家。

本來日本隊出線輸贏都好開心，《足球小將》志偉衝出世界好開心，但就因為 Klab 處理手法不當，「㷫」典氣氛盪然無存。

情況就好似龍珠 DK「龍石 Pack」，買完先同你講出錯，原來只係占星婆婆 pack，唔退款仲屈你拎返堆垃圾幣，試問玩家情何以堪，點撐得落呢間公司？

今日來講，《足球小將》只能說是經典作品，後來的《青之蘆葦》、《Beblue》，新作品如《BlueLock》嘅創意好過足小多多聲，但《足球小將》賣情懷，係男人都可能練過彈跳射球同辛坦拿轉身，就算高橋陽一已經畫到球員可以踩波滑行、可以轉去對手心口「計時炸彈」，計好時間「爆炸」彈去指定位置，隨時荒謬過《網球王子》，大家都只係撐童年回憶。但係今次，真係撐唔落，有唔少玩家心淡退款。

一隻手遊營運不當好平常，但明明「世界盃＋日本隊」，《足球小將》遊戲可以做得更好，但就竟然反過來爆退款潮。

呢隻《足球小將 DreamTeam》，愈來愈變得「Pay to Win」，研究含量奇低，想贏？課金而已。就算 Klab 稱以競技比賽為賣點，似乎最後都係天下手遊一樣黑？據了解好多心淡玩家，唔想益 Klab 但又對《足球小將》呢套作品放不低，唯有轉玩淘寶石號，向 Klab 課金說不。

我作為玩過、失望過而又仲有玩嘅人，見玩家愈來愈少，只能感慨一句，Klab 令到一代童年回憶蒙羞，多行不義必自斃，唔得民心嘅遊戲，關服是唯一命運。