描述核戰後世界嘅知名系列《異塵餘生》（Fallout）今年正值面世 25 週年，官方有慶祝活動，Fans 亦有自己方法，當中有位擅長做小遊戲嘅玩家就自行製作《異塵餘生 Lego版》，將原作所有事物 Lego 化，同時又不失原作味道，最正係以免費方式推出，齊齊同樂。
《異塵餘生 Lego版》由 ThrillDaWill 花費數月完成，基本上就係將原《異塵餘生》變成大家玩慣玩熟嘅 Lego 冒險遊戲玩法，可自由切換第一及第三身視點。玩家將扮演 111 號避難所倖存者，醒來之後喺避難所入面尋找武器，嗶嗶小子再出荒地探索，會有各種道具以及武器供搜索拾取，仲有任務玩，不過講到最正嘅係連經典「VATS 射擊」都有得用，還原度甚高！
《異塵餘生 Lego版》已經於 itch.io 平台推出，免費遊玩，遊玩時數大約 3-4 小時，遊戲大小為 2 GB。現時雖然有唔少 Bug，但作者已經不停進行更新。
動漫電玩宅，極愛金田一系列，擅長動作及策略遊戲