又有一隻恐怖 Game 趁萬聖節推出相關活動！新作《You Will Die Here Tonight》為配合 Steam「尖叫節」，推出總共六個章節嘅免費試玩版，呢款遊戲有種古早味嘅恐怖感（有陣《Clock Tower》味），同時更會因應你所做嘅行動同決定影響後續角色，緊張刺激得黎又有策略性，幾唔錯！

《You Will Die Here Tonight》由 Spiral Bound Interactive 開發，係一款恐怖生存遊戲，平常活動會以第三身視點表達，射擊戰鬥時會變成第一身視點。故事講述一隊叫做「白羊座」嘅部隊，受命前往神秘大宅 Breckenridge，但到達時被神秘力量分開，所以玩家就要扮演各小隊隊員探索及尋找其他隊員。

遊戲過程與一般冒險遊戲大同小異，都係四處尋找線索、解謎以及戰鬥。有趣嘅係，死亡係無法避免，而你所操作嘅角色進行任何行動或決定都會影響後面嘅角色（死亡的話你都會化身為喪屍大軍一員，襲擊自己昔日同伴）。例如地上有數盒子彈，你拎晒的話，下個角色到達時就會無資源拾取，因此要謹慎管理資源，只拎自己需要嘅數量即可。另外，你亦可購買武器升級裝備，同樣地你拎走用作升級嘅資源下個就無得用，真係每步都要計住。

《You Will Die Here Tonight》預計 2023 年推出，對應平台為 PC Steam。今次「尖叫節」活動已經開始，並於每日 00:00 更新一個章節，到 10 月 30 日會全部開放六個章節，支援繁體中文。