俄羅斯入侵烏克蘭嘅軍事行動仍然持續，當地人民除不但奮力對抗，更想盡辦法將呢個罪行用各種方式紀錄，今次介紹嘅免費遊戲《鳥克蘭戰爭故事》就係其中一員。作品改編自烏俄戰爭真實故事，透過扮演平民去體驗佢哋經歷過嘅遭遇，即使主要以文字敘述，但仍然感受到果種無力、責任與抉擇嘅困難。

《鳥克蘭戰爭故事》（Ukraine War Stories）由 Starni Games 開發，係一款視覺小說遊戲。遊戲以俄羅斯入侵烏克蘭最初幾個月為背景，描述被困於俄羅斯佔領區嘅幾個故事，而呢啲故事係由倖存嘅平民口述故事，因此所有內容都是用真實事件或目擊者嘅描述來改編，係真正血淋淋嘅現實。

本作係一款視覺小說型遊戲，以平民身份去體驗身處之地被佔領下嘅極端情況。玩家將會喺三個不同城鎮體驗三個短篇故事，分別係一對老夫婦、一對姐弟以及一位戰地醫院醫生。老夫婦嘅故事發生喺爆發戰爭前，當時大家都唔相信會戰爭，但情況急轉直下，俄軍大軍壓境，老伯要喺照顧自己以及妻子嘅情況下尋找離開嘅方法。喺姐弟故事入面，描述弟弟身為家中唯一男性，如何喺俄軍襲擊下拯救自己同姐姐。最後醫生故事中，見到滿地傷患，到底喺幫人與安全之間要如何抉擇，每個故事目標都係講緊你與你所珍視嘅人如何逃離戰場。

本作最主要玩嘅就係做出各種選擇，唔同嘅選擇會改變你同相關人士嘅心理狀態與物資數量增減，有部份選項更加要消耗一定數量嘅物資先揀得，所以要做好資源管理，而且唔同選項更會影響到角色後續嘅選擇與命運。另一方面，當同伴嘅心理狀態疲憊時，就需要通過消耗物資以及自己嘅心理狀態去鼓勵佢哋，當你自己嘅心理狀態歸零時，遊戲就會結束。因此玩家應盡量嘗試不同選擇令角色獲得相對較好嘅結局，而唔係令佢面對既真實又殘酷嘅現實。

開發團隊表示，本作將不會有任何需要付費購買嘅項目，並且完全免費，因為佢哋製作呢款遊戲目的並唔係諗住賺錢，係希望透過遊戲令全世界人都知道烏克蘭人目前處境。開發團隊更有成員曾一度遇到俄軍入侵部隊，佢同家人喺地下室避咗一個星期先成功逃離，相關事件亦都有收錄至遊戲中，亦有唔少喺戰時拍攝嘅照片供瀏覽。由於本作目的主要係傳達烏克蘭慘劇，所以有唔少志願人士幫手翻譯，令到本作有多達十二種語言顯示。

《鳥克蘭戰爭故事》（Ukraine War Stories）已經推出，對應平台為 PC Steam，支援繁體中文。