《鬥陣特攻2》（Overwatch2）走勢仍然淩厲（雖然好快就要面對自家 COD 嘅挑戰），當中最受玩家期待嘅完整 PvE 合作對抗打電腦模式要等到 2023 年先有得玩，但根據過往嘅慣例，每次特定節日都會有簡單版嘅 PvE 玩，而且仲會有少量劇情同動畫睇，最正係有限定 Skin 拎 or 買。根據消息，首個 PvE 活動將會喺今個萬聖節登場！

根據 Dot eSports 嘅報導，今年萬聖節暴雪已經確定玩咗多年嘅「鼠肯斯坦復仇記」再次回歸，今次有新 PvE 活動「鼠肯斯坦復仇記：新娘之怒」（Junkenstein’s Revenge: Wrath of the Bride），活動預計於 10 月 25 日至 11 月 8 日舉行，依然係四人合作，參戰角色分別係「垃圾鎮女王」「霧子」「索潔恩」「艾西」，部份會有全新萬聖節造型以及新名牌獎勵，當中索潔恩「生化偵探」已經可在遊戲中購買。

喺已流出嘅圖片中見到活動關卡將會係艾希瓦德，路線已包括 A、B、C 點，有可能要打整張地圖，可以先「踩點」諗定點玩。根據過往慣例，每次活動都會有五個傳奇造型、特寫、表情、語音、噴漆等物品俾玩家「抽」，另外會有三個史詩造型、頭像等係做活動農。由於今集變成免費制，所以大機率唔會係抽箱，估計會將艾西「術士」、駭影「新娘」兩款舊 Skin 加上其他三個新造型放於商店賣，其他史詩造型（包括敵人 Skin）則放在活動任務中。

今次活動流出後，外國有唔少玩家都覺得「又係鼠肯斯坦復仇記」，只係將舊活動換少少內容當新活動欠缺誠意，但係新鬥陣吸引唔少玩家，短時間內有多一個活動玩起碼好過完全無任何動作。如果暴雪有打算每次節日添加活動嘅打算，咁已可肯定年尾活有「雪球大作戰」、年頭有「零度叛亂 PvE」、夏季有「路西歐競球」以及每年嘅「週年慶活動」，再加埋正式嘅 PvE 模式，內容其實都算豐富嘅。

相關回帶文章：

【遊戲新聞】大量問題仍大受歡迎 《鬥陣特攻 2》線上人數遠超上集得到絕佳成績