恐怖 Game 大家玩得多，俾巨型公雞追殺你又試過未？即將推出嘅新作《Chicken Feet》就要喺手無寸鐵嘅情況下獨自面對一隻巨型公雞，齋睇已經夠晒恐怖，仲要用最新嘅 Unreal Engine 5 製作，畫面更逼真，問你死未！

《Chicken Feet》由獨立製作人 Dylan Bassett 開發，係一款恐怖潛行冒險遊戲，採用第一身視點。基因工程研究中心 GOOBER 入面一隻基因改造過兼有強烈攻擊性嘅巨型公雞掙脫束縛，並殺死求救數十名研究人員。玩家將扮演呢個研究中心一位實習生，被派去回收呢隻咁可怕嘅巨雞，你將跟隨無線電嘅指示，一步步地引誘巨雞進入安全捕捉嘅地方，不過大家似乎太低估呢隻巨雞……最後你能否生還並完成任務呢？

遊戲主要係玩潛行，喺整個誘捕 / 逃命過程中都無還擊能力，唔好期待有咩激烈嘅戰鬥，只有無盡嘅追殺等緊你，玩家可以做嘅就係盡量利用狹小空間以及黑暗去躲避。本作雖然用 Unreal Engigen 5 製作，但其實算係實驗性作品，遊玩時數大約只有短短兩小時，同時意味住你要面對一隻高過你兼有強大獵殺能力嘅巨雞兩個鐘，又真係幾得人驚。

《Chicken Feet》已經推出，平台為 PC Steam。