用「紙」做主題嘅遊戲唔少，但同時玩埋恐怖元素嘅又真係唔太多。新作《Paper Cut Mansion》係一款喺紙造世界中冒險嘅恐怖遊戲，奇特嘅美術加上燈光運用，立即賦予遊戲一種獨特嘅味道，撞正檔期推出，夠晒應節！

《Paper Cut Mansion》由 Space Lizard Studio 開發，係一款 Roguelite 恐怖動作冒險遊戲。玩家將扮演紙造世界（所有角色、道具、場景都係由紙造的）入面一位刑警「Toby」，奉命進入一座充滿謎團嘅古老大宅進行探索及搜集證據，解開埋藏於此不為人知嘅祕密。

喺古老大宅中有大量隨機生成房間存在，並會分成不同次元，有機會係解謎鬥智空間，有機會係敵人等待你嘅戰鬥空間，亦有機會係於寒冷環境下尋找熱源求生空間，隨配置不同會改變美學及玩法，每次遊玩都充滿驚喜及樂趣。

戰鬥部份，玩家可自訂啱自己嘅風格，可以 Set 做近戰又或者做遠攻射擊，亦可以設置戰鬥無人機或工程機去起陷阱同砲塔，玩法極自由。隨遊戲推進會解鎖新能力及新裝備，令你可組合嘅玩法更多。另外，各種登場敵人會有自己嘅 AI 思考模式，會採取意想不同嘅方法進行攻擊，夠晒挑戰性。

主線劇情以外，探索過程中會遇到大宅中各式各樣嘅 NPC，可完成佢哋嘅委託得到相關嘅獎勵及知道更多呢座大宅嘅祕密。根據官方資料，會因應玩家嘅選擇而有不同結局，總數多達廿七個。順帶一提，玩家只要喺途中死亡就會去返最初場景由頭玩過，唔好諗住玩堆屍戰術，唔 Work 的。

《Paper Cut Mansion》Xbox Series X|S、Xbox One 及 PC Steam / Epic Games Store / GOG.com 預計於 10 月 27 日推出，PS5、PS4 及 Nintendo Switch 版本則會於稍後時間上市，另外 Steam 有提供免費 Demo 下載。