MOBA 類型由《DOTA》、《三國》、《信長》開始就一直廣受玩家喜愛，到《英雄聯盟》推出後更雄霸半邊天，站於 MOBA 類型頂點多年。一直都有唔少挑戰者出現，但仍然無法撼動其霸者地位，不過黎緊會有位「最強挑戰者」出現，因為呢款新作《Evercore Heroes》正正就係等待多時嘅「Project V」真身！

《Evercore Heroes》由 Vela Games 開發，佢哋嘅成員係來自 Riot Games、EA、Blizzard、Epic 等公司，擁有極豐富嘅開發經厭。本作有 MOBA 元素，同時加入動作角色扮演、MMO、多人競技等元素，溝埋變成一個新嘅類型「MOCO」（multiplayer online co-op game）。遊戲中玩家將會進入科幻世界「Lumerea」，組成四人隊伍與其他三隊隊伍鬥快擊殺關卡盡頭嘅頭目，當中要講求團隊合作、個人技術、配裝配技、策略，非常適合進行電競比賽。

可玩角色暫時公佈咗八名，齋睇片都見到有明確地分成坦、輔助、DPS、刺客等職業，技能就自然隻隻英唔同。當你打敗敵人後會得到金錢同經驗值，用於該場強化英雄。完場後亦有自訂要素，例如解鎖角色天賦技能，亦可自由選擇技能配搭，視乎情況或隊伍組合切換。

遊戲流程喺前期每隊都會有指定任務要先完成，完成後會得到 Buff 等豐厚報酬，之後擊敗指定目標敵人會得到進入關卡 Boss 房鎖匙「Luum」，不過由於關卡 Boss 只有一隻，而且開房後所有隊伍都可以打王，先擊殺嘅隊伍勝，所以前期做越多任務拎越多 Buff 就越有利，要主力做任拎 Buff 定係速攻 Boss 都係玩家要考慮嘅戰術。

除咗做任務打王，關卡中會有一舊叫做「Evercore」嘅物體，敵方怪物會主動攻擊佢，如果被爆就當玩家輸，所以全體出去做任務亦未必可行，分工都係一種策略。現時已知會有寒冷地帶「Kru」及叢林島嶼「Moxy」兩個地圖，之會應該會陸續開放更多地圖。

《Evercore Heroes》預計於 2023 年推出，採用基本免費制，暫時只會有 PC 版本，並會進行多次測試，有興趣嘅玩家可到官網註冊或加入佢哋嘅 Discord。