喺 2016 年推出手機版，2020 年推出 Steam 版本嘅回合制策略遊戲《The Battle of Polytopia》，日前正式推出 Nintendo Switch 版本，呢款作品簡單易入手同時又富有深度，所以喺推出多年仍然持續獲得好評，未接觸過嘅朋友真係要試下！

《The Battle of Polytopia》由 Midjiwan AB 開發，係一款回合制策略遊戲，原版支援多人遊戲，但 NS 版則只有單人模式。遊戲主打「4X」，即係 eXplore 探索、eXpand 擴張、eXploit 開拓同埋  eXterminate 征服。玩家要派出自家生產嘅單位探索地圖、採集資源、與其他部落戰鬥、開發新技術、擴大領地。

初始部落有十二個，每個部落都有自己嘅特性、動機以及優劣之處，有弓兵強大嘅部族；有可騎豬嘅戰士部族；有可以係獵殺野獸獲得額外糧食嘅部族，玩法各異。每回合完結時會根據自己嘅人口得到星級用嘅星星，可用咗開發新技術又或者解鎖單位、建築及能力等等（後期更可起碼頭打到出海），到底要主力提升人口谷科技，定係穩步強化軍力打長期戰，全部都有考量。

另外，喺遊戲開始時只有一小塊領地，領地外未經開拓嘅地方會有冰覆蓋，加上地圖係隨機生成，你係唔會知道附近有咩同對手位置，所以要派哨兵進行探索，有玩過《世紀帝國》嘅玩家應該唔會陌生。遊戲將提供以三十個回合內自由發展嘅 Perfection 模式、無限時以擊敗所有敵對部落嘅 Domination 模式，以及自訂規則嘅 Creative 模式。

《The Battle of Polytopia》Nintendo Switch 版已經推出，PC Steam 版及 iOS / Android 亦已推出。