經營類遊戲歷史悠久，喺大多數遊戲入面「村民」或「市民」都係扮演「工具人」角色，玩家會安排各種工作俾佢地，生產資源令城鎮發展，但係有無諗過如果啲村民有自我意志，唔係你話要佢做咩就做咩會點呢？新作《The Tribe Must Survive》嘗試為村民加入 AI，每個人都有自我意志，更考你管治嘅手腕！

《The Tribe Must Survive》由 Walking Tree Games 開發，係一款俯瞰型村落經營生存遊戲。作品加入克蘇魯神話元素，以一個氣氛陰森恐怖嘅石器時代村落作為舞台，「有人」潛伏於村莊周圍嘅黑暗中，作為領導者嘅玩家除咗要帶領村莊發展壯大，更要保護人民免受黑暗入侵者潛伏侵蝕。

經營部份同其他同類型遊戲大同小異，最大嘅特色在於所有登場嘅村民都會有獨立 AI，佢哋會好似真人會做自己想做嘅事，即使玩家要求佢哋按照指令做事仍然會依照自己意願自由行動。幸好玩家可透過進行儀式、建築、升級等各種選項，去影響村民嘅想法從而改變佢哋嘅行動，同時本作有生存及 Roguelike 元素，內容係多變化兼豐富。

《The Tribe Must Survive》PC Steam 搶先體驗預計於 2023 年推出，正式版就計劃於 2024 年推出。順帶一提，喺今年二月曾推出試玩版並廣受玩家好評。