講到喺海上冒險，《Sea of Thieves》就肯定係第一名，超逼真嘅海洋、富有深度嘅解謎、精細嘅海上戰鬥都令玩家們津津樂道。下年就有主打海上戰鬥強勁嘅挑戰者《Skull and Bone》，同年另一款新作《Pirates Of Pangea》亦都會推出，加入建設、耕種等元素，以抵食夾大件姿態迎戰兩款大作！

《Pirates Of Pangea》由 Pangea Game Studios 開發，係一款海賊生存冒險遊戲，使用第三身視點，支援多人線上合作。玩家將身處巨大生物與海賊橫行嘅大海賊時代，並不時會出現「百慕達三角」引致超自然現象發生，導致大量異常天氣以及雪人、海怪等巨大生物出現。身為海賊嘅玩家，除咗要穿越危機四伏嘅「百慕達三角」，仲要去到島上收集資源建立據點，慢慢強化實力搵辦法返去自己嘅世界。

作為一款海賊遊戲，航行、尋寶、海戰、白兵戰等等一應俱全，不過畫面質素就比較陽春，而且戰鬥系統亦都比較簡單，就算只有一人都可輕鬆操作。喺本作入面可對船隻進行改裝，玩家可以將船隻加裝大砲變成戰船，亦可以擴建船艙變成貿易用船（本作係可以玩貿易運貨賺錢），不同類型船隻數值會有所差異，並且要因應海上嘅狀況，例如暴風雨、颱風等去切換船隻，務求平穩到達目的地。

冒險部份分為海上及陸上，喺海上冒險時有機會得到藏寶圖碎片，收集所有碎片拼湊成完整藏寶圖尋找寶藏埋藏地。有時會係被海上淹沒嘅金字塔、有時係古代遺跡、有時係裝載金條沉沒船隻嘅坐標，更有機會發現隱藏島嶼又或者時間限定喺海底突然出現嘅島嶼，鍾意玩探索嘅朋友應該好啱你口味。

陸上部份就主打生存、建築及製作。玩家可透過陸上探索，尋找資源建造據點，耕作、採集、打獵就可獲得食物，然後仲有得玩烹飪獲得短暫能力加成，亦可以使用家具製作特色料理，例如用晾衣架上晒肉乾。最正嘅係有得玩釀酒，之後再同其他玩家分享出海時劈酒，非常咁海盜。

《Pirates Of Pangea》預計於 2023 於 PC Steam 平台進行搶先體驗，初步已確定有 10 種船、400 種工藝品、100 種建築裝飾等等。