今次為大家介紹嘅獨立遊戲《Boxville》好特別，成隻 Game 有劇情有 NPC 但就無任何對白，溝通與敘事都係靠繪畫去交流表達。就咁睇可能會有「敘事麻麻」嘅感覺，但實際上靠簡單繪畫「意會」比想像來得有趣，玩落係幾好 Feel！

《Boxville》由烏克蘭獨立團隊 Triomatica Games 開發，屬點擊解謎冒險遊戲。故事發生喺一個全部都係金屬罐同盒嘅世界，每日都過住平靜而幸福嘅生活，直到有一日發生大地震。因為地震令到主角與佢嘅愛犬失散，為咗搵返佢開始四處探索，但地震令到城市滿目瘡痍，要穿過並唔容易。玩家必需想辦法幫助主角「藍罐」解開謎題前進，途中更會結識新朋友以及搵出地震嘅原因。

遊戲主要玩法係透過點擊與物品互動，解開物件之間嘅邏輯謎題與環境任務，而且謎題係一環接一環，每解開一個謎題就會開啟下個謎題。例如前期任務，幫跌出街嘅罐返屋企，過程中會得到較剪，可用於剪草，偷偷地去剪草後再與木棍合成就會得到掃把，可給于清潔工罐頭，之後佢掃地會出現鉛筆，插去旁邊嘅板就會變成日晷等等，每當你解開一題就會打通之後嘅思路。

遊戲另一特色係所有嘅角色都無對白，佢哋會透過紙板繪畫進交流互動，好多時都係用四至六格漫畫去表達，玩家需自行「意會」。透過解讀劇情，玩家會識到新嘅朋友，與不同嘅罐互動更係解謎重點，好多時角色與所表達事物嘅關連係解謎關鍵，想更具體了解嘅可以睇官方放出黎接近一小時嘅遊玩影片，不過會解晒啲謎影響遊玩。

《Boxville》PC Steam 版已經推出，之後會推出手機版及家用機版本，支援繁體中文（意義何在？）。