台灣製作嘅遊戲一直都有唔少佳作，例如《返校》、《還願》、《眾神之鬥》等等，我哋早在兩年前就有介紹過一款同樣高質嘅遊戲《小魔女諾貝塔》（Little Witch Nobeta），屬動作解謎遊戲，喺早期不但得到多個獎項，玩家亦都一致好評，去到日前仲正式出埋家用機版本，之前無玩過 PC 版嘅真係要試下！

《小魔女諾貝塔》（Little Witch Nobeta）由台灣獨立遊戲團隊 Pupuya Games 開發，採用第三身視點，屬於動作射擊解謎遊戲（Steam 上面有寫「類魂」，但係假的）。故事講述小魔女為了解開自己的身世之謎而獨自前往古堡，並邂逅神祕小黑貓以及各種造型好正嘅 Boss，至於後面嘅故事就留返比大家探索啦。

角色設計真係好正！（圖為 NS 限定版封面）

雖然遊戲類型屬於動作射擊動作，不過唔好誤會佢係一隻 FPS 式遊戲，戰鬥系統反而更偏向動作類型。同大部份動作遊戲一樣，都係有基本嘅近戰攻擊、迴避、跳躍、吸收陣（招架）、使用道具等動作，不過面對絕大多敵人都要先睇清楚攻擊模式再反擊，換血打法不適用於此作。

既然主角叫得做魔女，主打嘅梗係魔法。魔法有二種使用方式，一種係類似 FPS 遊戲咁手動按鍵瞄準再發射，或者鎖定目標後盲射（命中率當然有所下降）；另一種係詠唱魔法，需要詠唱時間及消耗大量魔力，當然有代價就意味住有回報，威力遠勝普通魔法之餘仲會有凍結等各種附加特殊效果。以「秘法元素」詠唱魔法為例，有穿透屬性，即使對方有盾都可以打穿，適時轉換魔法係本作樂趣之一。

使用魔法自然要扣 MP，回魔手段有食藥、或等佢自然回復（超慢速）、怪物死亡後掉落回魔，但當去到打王時就要用另一種回魔手段，就係近戰攻擊命中。用近戰攻擊命中敵人後就會回復若干魔力，所以諗住一味打帶跑屈遠攻係唔太可行，要適時接近敵人近攻回魔。當然，敵人受到一定程度會造成大硬直，趁機扑佢幾野都係可行方法。

遊戲中小魔女會學識四種魔法，每種魔法嘅特性又有分別，例如雷屬性係打遠距離、火屬係散彈咁。玩家可自行配搭各種魔法打出自己風格，例如我就最愛玩火屬魔法+近戰打埋身肉搏，特別係打王時喺準確嘅時間成功迴避敵人攻擊，就會有 Bullet Time 效果，打近戰可瘋狂輸出超爽。

《小魔女諾貝塔》PC Steam 版已經推出，PS4 及 Nintendo Switch 版則於 9 月 29 日推出，支援繁體中文及日語配音。