之前推出嘅彈幕生存遊戲《吸血鬼倖存者》（Vampire Survivors）雖然無華麗嘅畫面，但係有趣兼充滿魔性嘅玩法成功得到玩家嘅喜愛，闖出一條新道路。差唔多玩法，但畫面更精細嘅新作《 Rogue: Genesia 》，推出搶先體驗後逐漸引起玩家關注，Steam 玩家數量 Keep 住升緊，喺最高峰時更有超過 2,500 名玩家正在遊玩，而且仲得到「壓倒性評價」，氣勢唔錯！

《 Rogue: Genesia 》由獨立製作人 Huard Ouadi 開發，係一款有輕度 Rogue 元素嘅彈幕生存角色扮演遊戲。玩家將扮演主角 ROG，喺新世界入面瘋狂地殺殺殺！遊戲基本系統與《吸血鬼倖存者》大同小異，但因為加入角色扮演要素，玩家喺掃盪完一個地區之後將會進入下一關，並可自由選擇前進道路，體驗每次不同嘅路徑。

過關後會去到地圖畫面，選擇要前進嘅地區，但等緊你嘅唔係只有戰鬥內容，有機會係寶箱、商店或者係隱藏要素。因為要選擇關卡，玩家就要決定打多啲怪累積經驗，定係去商店或寶箱拎卡片去強化能力，令之後嘅關卡選擇範圍更廣。呢種玩法令本作不再係單純嘅生存模式，有別於《吸血鬼倖存者》。

遊戲玩法係操作角色移動，角色會自動發動攻擊，方式、射速、射擊間隔等會因武器及 Buff 而異，玩家要做嘅主要都係避開敵人包圍逃跑。當玩家擊敗敵人會獲得經驗值，升級後可抽取新嘅能力及武器卡，再用自己嘅喜好去配搭各種技能級武裝。根據官方資訊，現時提供 60 多種被動能力及 16 種武器，數量有點少，希望之後會持續增加。

《 Rogue: Genesia 》現時已於 Steam 進行搶先體驗，同時有提供 Demo 試玩版，並且以超抵玩價 HKD $18 發售。