又有一款新嘅類魂遊戲推出，不過今次就玩平面嘅。《No Place For Bravery》製作團隊表明受到《隻狼》（Sekiro）嘅影響，喺呢款遊戲入面以生死攸關嘅緊張戰鬥為特色，不過我就覺得似類魂多過類隻狼，因為無「拼刀」呢個咁重要嘅元素，但係高難度嘅玩法仍然值得一玩。

《No Place For Bravery》由獨立團隊 Glitch Factory 開發，係一款平面類魂動作角色扮演遊戲。故事講述一位退役嘅戰士索恩，終於得到被神秘術士拐咗而失散多年女兒嘅線索，於是帶埋養子重返戰場，為嘅唔單只係拯救女兒，亦都係為咗實現自己嘅野心而再次上路。

戰鬥系統充滿魂系遊戲嘅味道，角色有生命值、防禦值、體力值三項，角色不論攻擊、防禦、閃避、施放技能都會消耗體力，隨時間會自動回復，但就限制角色做連續動作嘅次數，例如滿體力只可以進行五次普通攻擊。防禦值則會因應敵人傷害而消耗，一旦歸零就會陷入大硬值狀態。另外，與其他平面動作遊戲不同，本作可鎖定面向敵人方向，方面邊防禦邊觀察敵人動作。

除咗基本戰鬥方式，玩家可解鎖技能學習新嘅攻擊方法及弓箭等技能，可透過擊敗敵人或寶箱中獲得。地圖則設計有多個區域，包含高低差地型、陷阱、解謎拼圖等等，另外會與各種角色相遇，當中嘅選項更會影響整個救贖之旅嘅故事發展。

《No Place for Bravery》已於 9 月 22 日推出，對應平台為 Nintendo Switch 及 PC Steam。