《LOL》（英雄聯盟）雖然推出多年，但仍然有極龐大嘅玩家群，將會推出使用《LOL》世界觀嘅格鬥遊戲《Project L》自然同樣備受注目。喺之前發表嘅影片，除咗透露遊戲開發進度之外，更宣佈本作將會免費遊玩，並公開「海妖祭司 – 伊羅旖」參戰消息。

《Project L》由 Radiant Entertainment 開發，曾製作格鬥遊戲《Rising Thunder》，喺 2016 年時被 Riot Games 收購。《Project L》玩家需要選擇兩位角色，戰鬥中可隨時切換。影片中所見，按鍵應該屬於輕、中、重同必殺鍵，部份招式可將敵人浮空，有 Jump Cancel，有簡易連招及簡易必殺技指令。切換角色就類似《Dragon Ball FighterZ》，分為「召角色進行支援攻擊」、「發動攻擊並切換角色」以及「切換角色」三種方式，有玩開類似格鬥遊戲嘅朋友應該唔會陌生。

詳細遊戲系統都要等隻 Game 有試玩先知係點，不過製作人 Tom 就帶來另一好消息，就係本作會以免費遊玩方式推出（應該有大量 Skin 課，希望角色唔洗課），並以玩家能夠喺幾十年內享受超高品質作品為目標。同時，亦都宣佈「海妖祭司 – 伊羅旖」參戰，將會係移動緩慢但擁有強大單發攻擊嘅角色，會係易上手型角色。

《Project L》仍處於開發階段，對應平台及推出日期尚未確定，不過 Tom 之前講過會喺 2022 年上市，大家耐心等候吧。