講到中式恐怖 Game 通常都會諗到台灣或者大陸，好少話會諗到越南，但係如果由佢地本土出產恐怖 Game 應該會幾正，話晒大家都有聽過呢個地方陰暗面，諗都覺得驚啦！新作《The Death | Thần Trùng》由三位越南人製作，體驗喺河內發生嘅神秘驚悚事件。

《The Death | Thần Trùng》由獨立團隊 DUT Studio 開發，係一款心理恐怖冒險遊戲，採用第一身視點。遊戲舞台設定於 2022 年越南首都河內市，玩家將扮演一位非常普通嘅後生仔，突然被神秘事件纏身，然後尋找原因嘅故事。

遊戲具體玩法係行路模擬器加解謎（有評價謎題水準麻麻），特色係會根據遊戲過情中嘅細節及決定，發展成不同嘅結局。另外由於背景設定喺現代真實世界，團隊實地取材製作遊戲場景，除咗有當地樓宇，仲會出現靈堂及棺材。雖然越南同我地有文化差異，但係見到呢啲野都會感到「周身唔聚財」。

《The Death | Thần Trùng》已於 9 月 15 日推出，並於 Steam 得到「壓倒性好評」，但根據中文語系玩家反映遊戲質素並非太好，同時只有簡中。