類惡魔城橫向動作呢個類型歷久不衰，每年都有大量同類型作品推出，每款作品都嘗試加入獨特嘅元素去吸引玩家，但大多數同類遊戲都無「單機多人合作」呢樣野。新作《Machina Blade》就有上述呢個元素，仲要加入埋 Roguelike 玩法，宴客自用都一流！

《Machina Blade》由獨立二人團隊 Guilda Entertainment 開發，係一款 Roguelike 類惡魔城橫向動作遊戲，最大支援單機四人合作。本作受到《Dead Cell》、《Devil May Cry》等遊戲啟發，戰鬥系統極之流暢爽快，Boss 戰更非常講求瞬間反應及技巧，加上每位角色定位玩法都有所不同，有玩近戰有玩遠攻有玩防反的，玩起上黎感覺真係唔錯。

遊戲現時以搶先體驗方式推出，暫時內容有限，但仍有三位角色選擇、數十種敵人、四款 Boss 及 50 多種可改變玩家操作嘅強化道具。製作團隊表明喺未來大約六至十二個月內將會持續加入新內容，包括新角色、新挑戰難度、四個全新敵人、一款 Boss，更會加入更多新機制，同時會逐漸調整價格。

《Machina Blade》已於 9 月 8 日推出搶先體驗，對應平台為 PC Steam。