有返咁上下機齡嘅朋友相信都聽過 or 玩過《Heroes of Might and Magic》（魔法門之英雄無敵系列），玩嘅係回合制策略同時結合具深度嘅奇幻世界角色扮演遊戲機制以及精彩嘅故事劇情，絕對係一大經典。今時今日，呢類慢節奏遊戲已經係稀有類型，但仍然有廠商嘗試推出呢類作品，新作《The Dragoness: Command of the Flame》（龍女：烈焰之令）就係屬呢類遊戲，暫時討論度不高不過整體好評居多。

《The Dragoness: Command of the Flame》由 Crazy Goat Games 開發，係一款回合制策略角色扮演遊戲。故事發生喺一個遭到龍族肆虐嘅半島 Drairthir，玩家被其中一方任命為指揮官，組建野獸大軍進行征伐，擊敗敵國為世界帶來和平，都係一貫大路野。

戰鬥系統就係玩行格仔，敵我各據一邊，每回合移動、攻擊、使用技能、防禦等，玩家可操作半人馬、獸人、巨鳥等不同類型兵種，各自有獨特能力。由於有 Roguelike 要素，每次進行探索戰鬥都會隨機解鎖新兵種、技能、法術及 Buff 等，而且玩家需注意資源控制，因為部隊每一回合都要消耗食物，飽腹度低下會影響士氣。

除咗外出掃盪，玩家亦可透過探索得到獎勵，有時係資源有時係技能，仲要開發強化首都，升級戰鬥單位、更換裝備、魔法及能力，同時要招募新兵增加軍隊實力補足戰力，當然仲要決定開發嘅發展方向，以發揮國家最大戰力。

《The Dragoness: Command of the Flame》已於 9 月 1 日推出，對應平台為 PC Steam。