又有一款玩精致唯美畫風嘅手繪解謎遊戲《落葉城》（Amber City）推出，製作團隊之前嘅作品《雨紀》（Flood of Light）大獲好評，今次新作同樣係拿手嘅解謎類型、使用唯美手繪畫風格，再結合優美舒適嘅配樂，玩佢就好似為平日緊張嘅生活解壓咁。

《落葉城》（Amber City）由獨立團隊 Irisloft 開發，係一款平面解謎冒險遊戲。玩家扮演一位身穿白裙嘅神秘女孩，喺一個破碎、空無一人嘅都市中醒來，透過使用手中嘅光，點亮「繭」令時光倒流，一步步咁修復城市，令繁榮嘅落葉城重現。

遊戲主要係玩解謎，玩法係計算光嘅數量、規劃移動路徑，尋找點亮繭嘅方法，隨著遊戲推進，玩家控光能力會逐步增強，可控制更多顏色嘅光。另外，玩家會有一隻幫手解謎機器人同伴，亦會遇到敵對嘅機械人，但係只能選擇躲避或趁機控制佢哋。

《落葉城》（Amber City）已於 9 月 1 日推出，對應平台為 PC Steam，有九個篇章總數七十關，並支援繁體中文。