《Pac Man World Repac》：大師兄返黎啦！

當唔少網民以為 Namco 吉祥物「Pac Man」唔會再有 3D 作品推出嘅時候，Namco 居然喺今年「任天堂Direct」做咗一次大動作︰公佈《Pac Man World》第一集 8 月尾出 Remake，叫《Pac Man World Repac》。

編按：《Pac Man World Repac（吃豆人 吃遍世界）》定於 2022 年 8 月 25 日推出，對應 Xbox Series X｜S、Xbox One、PS4｜5、Nintendo Switch 及 Steam。

《Pac Man World》係喺 1999 年推出嘅PS1 game，主要係當作嗰時「Pac Man」20 週年紀念作品。關於《Pac Man World》舊版開發可謂一波三折。

原本《Pac Man》喺大約 1997 年左右打算推出一隻 3D 新作《Pac Man Ghost Zone》，玩法同故事與《Pac Man World》可謂大有分別。然而當時 Namco 老細好唔 like 個 Pac Man Ghost Zone prototype，將當時《Pac Man Ghost Zone》人員差唔多炒哂。

睇番唔知邊位 Namco 職員流出嘅《Pac Man Ghost Zone》影片，玩法同操控令人諗起之前嘅 3D Platformer 劣作《Bubsy 3D》一樣咁笨拙同戇居。難怪《Pac Man Ghost Zone》胎死腹中，要由頭搞過隻 Game。

當時《Pac Man Ghost Zone》剩低嘅人員，即刻重整旗鼓整隻全新遊戲暫名《Pac Man 3D》。《Pac Man 3D》喺 1998 年 E3 Game 展公佈兼有 Demo 攤位玩，反應都叫唔錯。

之後《Pac Man 3D》就改名改番做《Pac Man World》，喺 1999 年順利推出，有大約百幾萬銷量。

筆者當年小學生嗰陣玩過隻原版，可以講係好過癮。不過隻 Game 對當時嘅我同其他 Gamer 係有少少麻煩，係第二個 Area「Ruins Area」個 Boss。

嗰個 Boss 應該係成隻《Pac Man World》最麻煩嘅 Boss，嗰時筆者搞掂呢條友搞咗好耐好耐，個 Boss 成日響度出茅招搞人……

寫就寫咗唔少喇，咁呢隻新版《Pac Man World Repac》係點呢？如果鐘意玩當年舊版嘅你就放心，同《Crash Bandicoot N.sane（袋狼大進擊）》一樣差唔多原汁原味，大部分關卡執靚哂！不過難度就無嗰時 1999 年隻舊版咁麻煩，最大改動就係 Ruins Area 嗰個大佬。筆者自己玩隻 Remake 就可以 1 Take 過，唔駛再死嚟死去響度呼天搶地。

筆者最鐘意嘅 Area 自然係「Space Area」，充滿科幻感嘅 Settings 同埋有成隻 Game 最好聽嘅 OST。

嗰個 Area 嘅 Boss 關卡係打飛機 Level，打到咁上下隻外星 Boss會「橫空出世」同主角 Pac Man 切磋。其實嗰個關卡個 Design 係致敬番 Namco 另一隻街機 Game《Galaga》，算係當年 Namco 有心思擺 Easter Egg 落隻 Game度。

最後爆咗機嘅 Credit 有個 Maze 俾玩家行，你如果係叻仔叻女嘅，會食到啲英文字母，食哂會出「Thank You for your playing」（類似咁嘅意思），算係幾暖心嘅設計。

不過隻 Remake 其實都有啲啲瑕疵，係「Maze 關卡」嘅 OST 唔係好跟足原本舊版 Game「Space Area」，同最後 Area 嘅 「Maze關卡」嘅 OST 係轉咗，唔係好明點解今次 Remake 要咁樣決定。

另外個 Factory Area 嘅環境 Redesign 無咗之前舊版嗰種爛溶溶，陰陰森森嘅感覺。

總括嚟講，成隻《Pac Man World Repac》算係做得幾有誠意，有舊版 Ending 同埋呢隻 Remake 先有嘅新 Ending。咁個新 Ending 係點呢就唔劇透喇。如果你好鐘意當年隻舊版 Game，呢隻真係唔好錯過。如果 Namco大方啲，將《Pac Man World 2》 Remake 埋就皆大歡喜。

編按：《Pac Man World Repac》開發及發行商為 Bandai Namco Entertainment。

———————————————

VJGamer 歡迎讀者投稿 – 如蒙投稿，請將文稿、筆名、作者簡介及聯絡電話，電郵至 [email protected]。