身為香港人，用香港做舞台嘅遊戲對我寧舍有吸引力，質素上乘的話仲會加多幾分，好似之前隻《Sleeping Dog》就係好例子。預計下年推出嘅新作《Wanted: Dead》玩 Cyberpunk 風格，舞台就 Set 喺香港，同時標榜係一隻充滿難度嘅硬核作品。當然，有自信講呢番說話梗係有返咁上下本事，因為呢間工作室就曾製作出名難玩嘅《Ninja Gaiden》（忍者外傳）系列。

《Wanted: Dead》由 Soleil Ltd. 開發（曾參與《Dead or Alive》系列與《Ninja Gaiden》系列開發嘅知名創作者岡本好古與松井宏明所創立），係一款動作角色扮演遊戲並包含射擊及砍殺元素，採用第三身視點。玩家將扮演精銳小隊一員 Hannah Stone，喺充滿危險嘅 Cyberpunk 香港與邪惡大企業周旋，以先進武器結合九十年代復古未來主義，描繪反烏托邦世界嘅感覺。

遊戲主要玩法係以《忍者外傳》砍殺玩法加射擊戰，近戰有武士刀、電鋸等等，遠距就有突擊步槍、衝鋒槍、榴彈發射器等各種槍械使用。另外，官方一直強調本作有多達五十多種血腥終結技，同時係一款硬核遊戲（Hardcore），非常有難度。唔想打打殺殺嘅，遊戲中會提供多款扮復古街機嘅 Mini Game 玩，例如係用音 Game 表達嘅卡拉 OK、橫向射擊飛機 Game 等等。

劇情方面除咗正常畫面表達外，更會加插 2D 動畫，破有日系遊戲味道。影片中就出現過一名穿著偽裝隱形斗篷嘅狙擊手，極有《攻殼機動隊》感覺，加上主角係一名警察同時又冒死去搗破犯罪集團，設定夠晒 Cyberpunk，極之貼題。

《Wanted: Dead》預計於 2023 年 2 月 14 日推出，對應平台為 Xbox Series X|S、Xbox One、PS5、PS4 及 PC Steam。