「要打就去練舞室打！」呢句咁深入民心嘅對白，竟然有遊戲將佢具現化！新發表作品《God of Rock》喺音樂節奏遊戲入面加入格鬥遊戲元素，用音樂與舞蹈同對手激烈地碰撞，完美地將《紫禁之巔》以新方式重現，正阿！

《God of Rock》由 Modus Studios 開發，類型係一對一音樂節奏格鬥遊戲，支援多人線上或線下對戰。玩法都係跟住音樂節奏睇準時間喺下面琴譜上撳返相應按鍵，每個音符代表一次攻擊，越接近中心點撳音符攻擊力就越強（即係普通音 Game 評分 Good、Great、Perfect 咁上下）。如果雙方喺同一個音符得到相同評級，則雙方都不受傷害。

當然，歌曲越難達成完美按鍵嘅時機就越難，雙方戰鬥自然會變得更激烈，同時仲會有對戰戰術考量。每次擊中音符都會增加必殺技槽，喺任何時間 Chok 招（例如 ↓ → + RB）就可使出 EX 必殺技，不但有可觀嘅傷害，更會為對手增加更多音符或各種 Debuff。如果儲夠三條氣更可以使出無視對方防禦嘅超必殺技，睇準扣得晒行血就一野轟落去，等對手無仇報！

遊戲現時有十二位角色（有不同能力及技能）、八個舞台以及四十多首原創歌曲，雖然歌曲數量唔多，但係有歌曲編輯器可以自行加減音符。模式則有故事模式、練習模式以及線上排名呢啲基本野，未來亦都預計會有更新。

《God of Rock》預計於 2022 年冬季推出，對應平台為 Xbox Series X|S、Xbox One、PS5、PS4、Nintendo Switch 及 PC Steam，支援繁體中文。