蛇叔（潛龍諜影 Metal Gear Solid）我諗都唔需要介紹，作為潛行遊戲類最具代表性人物，自然影響咗唔少遊戲創作者。今次介紹嘅遊戲《潛蜥碟影》（Covert Critter）不論係玩法、Logo、通訊畫面等都充滿濃厚致敬味道，但係就以幽默嘅方式去重新包裝整個遊玩概念，變成一款幾有趣嘅小品遊戲。

《潛蜥碟影》（Covert Critter）由獨立工作室 Raptorsoft Games 開發，係一款潛行動作遊戲，採用俯瞰視角。玩家將扮演變色龍特工「蜥叔」（Koss），利用自身強大嘅隱身能力及一堆小工具，潛入被恐怖武裝組織紅鷹所佔領嘅設施 GEKO，解除核武威脅。

遊戲基本玩法就類似初代《Metal Gear Solid》，用俯瞰視角躲避敵人巡邏範圍及視線，避開陷阱到達終點。過程中會得到各種有用道具，例如偵查無人機、禮物盒、蕉皮、夜視鏡等小道具協助通關，有玩過原作嘅相信唔會陌生，正式版本將會提供十個關卡。由於本作角色係一條變色龍，喺掩體靜止躲避敵人時會變成半透明，呢種細節令人會心微笑。

《潛蜥碟影》（Covert Critter）預計於明年推出，對應平台為 PC Steam，另外現時喺 itch.co 有免費體驗版下載。