【遊戲評測】超級上癮邪教羊《Cult of the Lamb》豐富元素玩唔停另有小心得分享

八月相信大家都煩惱緊玩咩 Game，因為實在太多選擇，既然係咁唔爭在加多一隻好野落選擇 List！之前我哋都介紹過嘅邪教羊《Cult of the Lamb》，正式推出後果然不負眾望，有極豐富遊玩元素，不論戰鬥定係城市建設部份都令人玩唔停手，身邊唔少朋友更已講明本作係佢哋心目中嘅 Game of the Year，極之推薦入手！

《Cult of the Lamb》由 Massive Monster 開發，Devolver Digital 發行，係一款有 Roguelike 元素動作冒險建造遊戲。玩家所扮演嘅羔羊快將被行斬首之刑，千均一發之際得到邪神力量附身，並以此力量擊敗一眾敵人並得到一班階下囚嘅敬仰。得到邪神之力後，羔羊決定以「師尊」之名，建立專屬於自己嘅邪教，廣納信眾排除異己。

要發展邪教第一件事梗係招收信眾，深入隨機生成嘅古老地下迷宮，擊敗假先知救出新嘅動物，帶佢返根據地後就灌輸信仰招佢入教成為追隨者，慢慢擴大人口。有人手之後就要喺根據地建造各種建築收集資源提供食物，再訂立教條、每日開佈道會滿足佢地精神層面。當持續令信眾感覺滿足就會加深佢地信仰，可以汲取嘅力量就越多，隨遊戲推進，之後會衍生更多玩法，下面會略略講解。

遊戲前期不論人手、資源都非常缺少，主要手段就依靠探索地城救人、採集資源，之後返城煮食、耕田、收集大便、起野等等（時間不會停止，不論打城或者搞內政都勁忙）。當教徒生活得好，對你嘅崇拜度自然越高，每當信仰度升級時就會得到「石碑碎片」，儲夠一塊就可以頒布教條，依靠教條可以左右遊戲玩法，非常重要。（不過間唔中都會有啲人醒覺，然後呢啲反骨仔就會開始造謠，煽動其他人離教。你可以選擇監禁佢重新洗腦，或者將佢獻祭滅聲。）

最快捷解決反骨仔嘅做法，就係將佢獻祭滅聲

頒布教條最主要有兩個功能，一個係解鎖教徒嘅被動技能，例如有「草食者特質」後，食青草餐唔會減信仰；「赦免主義者」無叛教者情況下增加工作效率。另一個主要功能係開啟「儀式」，亦即係可改變遊戲玩法嘅核心。每次開啟儀式都有兩個選擇，只能二選一，例如早期嘅儀式「斷食」與「盛宴」，前者係令教徒三日內飢餓度不降，後者係一次性令全教徒飽食度滿晒，因應自己玩法而去調節需要嘅儀式。

開啟儀式只能二選一，不能逆轉

要玩出創意，有好多唔同方法，例如先使用「勞累求榮耀」洗腦將體力鎖死，之後再用「富強儀式」逼教徒捐錢比你，再開三日不降飢餓度，咁就可以逼佢地不眠不休不吃不喝地瘋狂做野，由於有洗腦效果，就算你點奴役佢地都無問題。又或者戰鬥向玩法，先點出「婚禮儀式」與一名教徒結婚，再點出主角技能「復活」（效果係關卡中死亡只要獻祭一名教徒就可復活），萬一喺關卡中死亡就可以復活，因為獻祭伴侶嘅關係所以會額外多三個心心，之後再返城用「復活儀式」，下次出去打地城又會多一條命。

後期起咗減儀式成本及冷卻時間之後，差不多隔一日就可以再次使用，變相多一條命玩

強烈推薦先解鎖呢件裝備，每次開塔羅牌都會補一心，高難度必備

遊戲中有多種儀式，配搭不同 Buff、技能又會有唔同玩法，完全可以玩出自己 Style。儀式以外，城中建設又有唔同玩法，淨係農場都可以玩全自動化、極速生產，又可以起傳教團出去捉人信教、搵資源，惡魔召喚陣就幫你將教徒變成外出戰鬥嘅跟班，玩法極多元！

附身打通地城返城之後會變返原型，勁好用

仲有小遊戲可以屈錢

最後要講一講戰鬥部份，有 Rougelike 元素，每次進入嘅地城以及得到嘅武器、魔法都唔同，隨等級解鎖更多類型。玩法可視之為簡化版《Hades》，喺小地圖中擊敗所有敵人先可以進入下一版圖，最後打 Boss。會出現隨機關卡，有時會得到教徒，有時係資源或商店，途中會有抽塔羅牌嘅攤檔，一般係不同類型 Buff，看個人喜好配搭。另外，雖然睇落畫面簡單，但係難度絕對唔低，中高難度已經好有挑戰性，特別係回血手段極稀少兼得一條命，唔好比可愛美術呃到。

戰鬥部份可之為簡化版《Hades》，但係難度絕對唔低

每場開始前都係隨機武器、魔法，中途又要抽塔羅牌 Buff，變數都幾大

總結：

《Cult of the Lamb》雖然係獨立遊戲，但係不論戰鬥、城市建設部份都做得非常好，絕對可以用優秀兩個字形容，但個人認為有幾點需要喺後續更新加以改良。例如當去到中後期，教徒人數開始多時，遊戲中雖然有教徒一覽表，但就無法睇晒佢哋咩人負責咩崗位、與其他人關係等等，管理上比較不便；食物設定古怪，最低級莓果餐（+4）與最高級美味魚餐（+6）提供嘅飽食度只係差極少，成本效益仿彿叫人做最低級餐就可以。