人生總有高高低低，有時候會突然對某啲野失去當初嘅熱誠。今次介紹嘅作品《One Dreamer》就係講一個遊戲開發者失去當初熱誠嘅故事，喺幫助佢嘅同時，仿彿回顧玩家自身現實中係咪都有同樣失意、迷惘嘅時候，好有意思。

《One Dreamer》由獨立製作人 Gareth Ffoulkes 花費七年時間獨力開發，係一款平面解謎冒險遊戲。玩家將扮演主角 Frank，本身製作緊自己首隻作品，但係慢慢喪失咗對遊戲嘅熱誠。玩家要做嘅就係幫助佢重拾對遊戲嘅愛，並幫佢修復程式中編碼出現嘅問題，以此帶出製作遊戲背後嘅艱苦開發過程。

遊戲中玩家將一邊品味劇情，一邊接觸「偽」程式設計。遊戲中會出現以程式語言 C# 為藍本嘅「偽」代碼謎題，但係以易於理解嘅方式去表達，就算無任何程式底都唔驚，會文字選項比你點擊完成，當中更會有以代碼製作嘅迷你遊戲玩，加上與各種角色間嘅互動，精彩劇情配以高質音樂，玩落絕對舒服。

《One Dreamer》預定於 9 月 9 日推出，對應平台為 PC Steam，現時有序章試玩版免費下載，並且獲得「壓倒性好評」評價，試下無妨。