近幾年越黎越多廠商選擇自己搞一個遊戲發佈會，今次就到 THQ Nordic 喺琴晚（13 日）淩晨時段進行，有多達十幾款新遊戲發表，當中雖然並無啲好強勁嘅 3A 大作，但係唔少遊戲睇落質素都幾唔錯，最正嘅係有經典恐怖遊戲《Alone in the Dark》重啟版現身，下面就為大家整理同簡單介紹下琴晚有咩 Game 啦！

打頭陣嘅就係經典恐怖遊戲《Alone in the Dark》重啟版，本系列雖然並唔係第一隻生存恐怖遊戲，但係就絕對令生存恐怖類型遊戲發揚光大，即使後之後嘅《Biohazard》、《Slient Hill》都有受到佢嘅影響。

喺琴晚發表嘅影片入面只有極少量實機畫面，但係睇落不論氣氛、模組、戰鬥都係有現世代水平，感覺唔錯，希望出正式版時唔好縮水啦，對應平台 Xbox Series X|S、PS5 及 PC。

《Destroy All Humans! 2 – Reprobed》早早就公佈嘅遊戲，今個月尾就會推出，趁住今次發佈會出多一條有大量實機畫面影片。遊戲基本上係玩高自由度、大規模破壞配以黑色幽默呈現，主角係一隻大頭外星人，使用各種武器殺敵，係一款使用第三身視點嘅射擊動作冒險遊戲，可 2 人 Co-op，有繁體中文，8 月 30 日出，對應平台 Xbox Series X|S、PS5 及 PC。

《Space for Sale》係第一次對外公開嘅作品，玩法係基地建設加冒險，影片所見要打怪或探索收集資源，尋找可建設基地嘅地方，再逐步擴展基地設施，當中要考慮埋供電路線等等，支援多人連線合作，對應平台 PC。

《Gothic 1 Remake》個名已經話咗比你聽係一隻重製遊戲，原作喺 2001 年推出，普遍都係正面評價。故事背景設定於中世紀幻想世界，大約係講國家與囚犯間對峙嘅故事，然後囚犯果邊有內鬨分成幾派，有人支持反抗有人想畫面好睇就得。遊戲類型屬於動作角色扮演，跟原作的話會係第三身視點，對應平台 Xbox Series X|S、PS5 及 PC。

《Jagged Alliance 3》上年已經公佈嘅作品，今次影片就帶來更多實機片段。遊戲玩法屬於回合制角色扮演，有多人合作模式（即係《Gears Tactics》咁玩）。故事講述總統失踪，國家大亂，呢個時候總統家人聘請傭兵營救總統順便救國。由於玩家隊伍係傭兵組成，可以挑選不同類型、性格嘅人加入，佢地有各自嘅故事，一邊救國一邊玩 Team Building，對應平台 PC。

《The Valiant》幾個月前公佈，今次影片就有更多新資訊。遊戲類型係即時策略遊戲，玩小隊制，玩家可自行配搭各種作戰單位。故事講述前十字軍騎士因嫌倦殺戮離開戰場，但因為一件有滅世能力嘅古文物出土，為咗救世而重出江湖。

玩家組成嘅戰隊入面會位成員都有自己技能樹點，可以換裝及防具，不同武防都會有自己主動、被動技，就算係同一隻角色，只要配唔同技同裝備都會有新玩法。另外本作有合作及 PvP 模式，合作模式可以三人同遊，PvP 最多 2v2，支援繁體中文，對應平台 PC。

《Tempest Rising》新公佈嘅即時戰略遊戲，玩近未來風格。玩家要喺三大勢力中揀一個，每個勢力都有自己特性、玩法。基本流程都係建造各類型設施，生產作戰單位，升級科技等等，玩慣 RTS 嘅朋友應該秒上手。喺影片所見，本作有大量戰車單位，設計都幾唔錯，同《Starcraft》比又係另一種味道。有多人合作、對抗模式，2023 年推出，對應平台 PC。

《Knights of Honor II: Sovereign》公佈咗好一段時間嘅大型即時戰略遊戲，背景係中世紀歐洲，選擇扮演其中一國嘅國君，征服整個大陸。玩家要兼顧國與國之間嘅貿易、宗教、外交、城市建設等，配以類似《AOE》式嘅即時戰鬥。雖然睇落好似好多野要學，但係本作標榜簡單易上手，屬該類型入門遊戲，有多人合作模式，對應平台為 PC。

《Outcast 2 – A New Beginning》上年公佈嘅作品，相隔廿年後推出嘅續集。特式係可自由自在地於開放世界中飛行，係一款動作射擊冒險遊戲，採用第三身視點。喺影片中見到飛行時可進行衝刺、滑翔等動作，地上戰鬥時可使用自己砌技能嘅槍械，又或者用唔同類型技能攻擊。片中展示嘅「盾」就可以施展近戰、衝撞等動作，感覺幾唔錯。睇落去雖然同史詩式伏作《Anthem》有幾分相似，但本作係單機遊玩，又唔係「Challenge Everything」果間廠做，估計唔會伏得去邊，對應平台 Xbox Series X|S、PS5 及 PC。

《Wreckreation》一款瘋狂賽車遊戲，有大量猶如過山車軌道般曲折嘅賽道，玩家駕駛汽車與其他參賽車飛馳爭奪名次。片段所見，似乎可隨時於賽道上新增物件，可以係阻礙你前進嘅物件，亦可以係跳台，想玩非一般賽車的話呢隻應該啱你，對應平台 Xbox Series X|S、PS5 及 PC。

《Way of the Hunter》將於 8 月 16 日推出嘅擬真射擊冒險遊戲，採用開放世界，第一身視點，支援多人連線合作。簡單講就係擬真地打獵，要計彈道要摸清獵物習性，有興趣嘅可以睇返我地之前嘅介紹（相關文章），對應平台 Xbox Series X|S、PS5 及 PC，支援繁體中文。

《AEW Fight Forever》摔角遊戲，標榜無複雜輸入指令，易上手。加插唔少 Mini-Game，睇落幾有趣，可單機雙人或線上多人合作或對戰，對應平台 Xbox Series X|S、Xbox One、PS5、PS4、Nintendo Switch 及 PC，支援繁體中文。

《Stunfest World Tour》一款非常奇怪嘅競速遊戲，雖然主要玩法都係賽道上鬥快，但係你可以由孭住 Jet Pack 嘅「人型」狀態隨時變成駕車狀態，跳台飛起時又可以變返做人型滑翔，簡單講就係將賽車同極限運動溝埋一齊，最大可 18 人同場競技，對應平台 PC。

《SpongeBob SquarePants: cosmic shake》壓軸作品竟然係「海棉寶寶」系列新作，上集已經取得不俗成績，今集自然令人期待。今集仍然係第三身動作冒險遊戲，玩家將穿越七個不同世界尋找失蹤好友。玩法就類似《Super Mario Odyssey》，喺立體舞台中避開敵人攻擊後反擊，亦有賽車、解謎等玩法，絕對係大人細路都啱玩。暫時未有推出日期，對應平台 Xbox One、PS4、Nintendo Switch 及 PC。

總結：

雖然並無 3A 大作，但係《Alone in the Dark》、《SpongeBob SquarePants: cosmic shake》已經夠令人期待，戰略類遊戲《Jagged Alliance 3》、《The Valiant》、《Knights of Honor 2》都幾啱我口味，《Stunfest World Tour》睇落夠痴線，我就已經 Mark 咗呢幾隻喺「To 玩 List」，你又有無邊隻啱？