以前玩初代 PS 同 N64 啲 3D 遊戲真係大開眼界，轉視點諗方法解謎嘅玩法時至今日仍然有唔少開發人員仲係用緊呢招。新作《Frogun》就係模仿返昔日舊遊戲玩法，以點陣風格配以新世代畫面，重拾大家當年最初嘅感動。

《Frogun》由西班牙獨立製作人 Molegato 開發，係一款 3D 動作冒險遊戲。玩家將扮演一位成長於探險家族嘅小女孩 Renata，喺一次冒險中，因為雙親覺得遺跡廢墟太危險，留咗 Renata 喺營地，但係過咗三日都仲未見到父母歸來，佢就意識到一定係出咗事。身為探險家嘅女兒，立即拎起父母發明嘅「青蛙槍」，出發拯救深愛嘅雙親。

遊戲玩法主要圍繞喺青蛙槍嘅運用，蛙槍伸出黎條脷可對牆壁進行推、拉動作及啟動機關，亦可以吸附於牆壁移動，對敵人使用則可以吸佢埋黎再射出去打人。利用青蛙槍各種特性，時而轉換視點，時而吸附牆壁去解開各種謎題。當然，每個關卡都有隱藏區域及捷徑，頭目戰亦要利用蛙槍特性攻略，即係要用腦。情況就好似細個打機咁「過唔到咪諗下點打囉」！

完成各種挑戰任務以及收集徽章將會解鎖更多故事背景、角色設定、畫廊美術等等，路上執到嘅金幣就用黎買唔同造型嘅帽。最正嘅係有個模式係二人決鬥競技場，可以同 FD 玩隻揪，的確係幾爽！

《Frogun》已於 8 月 2 日推出，對應平台為 Xbox Series X|S、Xbox One、PS5、PS4、Nintendo Switch 及 PC Steam。