近期 Party Game 首推都係《Monster Hunter Rise Sunbreak》（？），但其實賤兔 Party Game《賤兔：傳奇派對》（Rabbids: Party of Legends）都喺早排推出，而且整體質素絕對唔差，當中有唔少都係要互相傷害嘅小遊戲，啱晒叫朋友黎屋企玩果陣宴客，包爽！

作為一款 Party Game，簡單易明易上手、競賽過程峯迴路轉、每場遊戲時間短、令人想一關接一關咁玩落去、可 1-4 人遊玩等元素本作通通都做到，小遊戲數量有多達五十款，雖然有小部份係加強版，但只佔少量，而且強化版都有好玩之處。例如有一個小遊戲係倒數到零時按鍵，強化版會變成睇唔到倒數時計，各有各好玩。

強化版會無咗倒數時計，大家鬥估嘅情況下真係幾過癮

Party Game 嘅核心都係小遊戲，喺《賤兔：傳奇派對》入面主要分為組隊同亂鬥兩種玩法，例如擺姿勢、跳舞、解密碼鎖等等，屬於自己玩自己果 Part 嘅經典玩法。組隊合作則會將玩家分成兩隊，划獨木舟就屬於呢類，一個負責控制速度一個負責方向，但又唔係一味死撳鬥快就得，要因應當時水流同障礙物調整速度，考技巧同時考埋與隊友嘅配合。

激流划獨木舟係幾好玩嘅組隊遊戲，好易炒船，但又要同人鬥快

拔金剛棒、畫圖形、拔廁所泵呢類就屬於半競賽類型，雖然都係各玩各，但因為大家會睇到對手即時分數，所以可隨時調整自己玩法，例如落後嘅就玩得再冒險啲，領先嘅就玩得保守啲等等。亂鬥如避鬼、餵馬、送蟠桃等可防礙其他玩家，即係撞人落街、卡位、推人強制移位等等，多人遊玩時係特別正。

畫圖型可即時睇到其他人分數，越玩越緊張

送蟠桃可以卡位撞人，推跌人地手上嘅碟

餵馬場地係冰上，要先跑過去拎稻草，再返轉頭餵馬，場上有洞，亦可以推人落坑，超適合多人遊玩鬥賤！

避開藏身於瘋兔入面嘅妖怪，過程中可互相推人，隨時間推進會越黎越多隻假兔，越後期越亂越開心

遊戲提供冒險及派對兩種模式，前者即係故事 Mode，講述一班賤兔闖禍進入《西遊記》世界，由佢哋扮演四徒孫一行人由大鬧天宮去到成功取西經嘅故事，但係用賤兔搞笑嘅方式去演繹，對白亦都幾有趣。派對模式就即係 Free Mode，自由選擇想玩咩 Game。兩個模式都可以 1-4 人遊玩。

小遊戲眾多，而且全部都係秒速上手，絕對係宴客佳品

故事對白設計用返「賤兔」設定，幾有趣

《賤兔：傳奇派對》（Rabbids: Party of Legends）已經推出，對應平台為 Xbox Series One、PS4 及 Nintendo Switch，支援繁體中文。