每年七、八月都係最啱玩恐怖 Game 嘅時候，啱啱又有一款新作《Ghost Watchers》開始咗搶先體驗。可以多人遊玩，玩法同之前大熱作品《Phasmophobia》類似（相關文章），入屋捉鬼扮演 Pokémon Master，一班人玩係幾歡樂。

《Ghost Watchers》由獨立團隊 Renderise Game Studio 開發，係一款生存解謎恐怖遊戲，採用第一身視點，最大支援四人連線合作。玩家將前往鬧鬼嘅廢棄大屋進行調查，查明裡面到底發生咩事。有可能係自殺者嘅亡靈，亦有可能係吸血鬼，甚至係邪惡嘅魔鬼，暫時預計有十多種鬼怪等你發現。

遊戲中會出現多種鬼怪，全部都喺三間廢棄大屋中恭候大駕。玩家要先收集各種資訊，例如係鬼魂年齡、當下心情、類型等，再去判斷佢嘅危險程度，之後再鎖定位置進行捕捉。當然，有玩家發現可用唔同嘅創意方法去「玩」隻鬼，捉咗佢之後當佢地拖咁用……真係人比鬼可怕……。另外，與《Phasmophobia》類似，玩家可使用磁場探測器、夜視相機、十字架等二十多種道具幫助自己。

《Ghost Watchers》已於 7 月 29 日展開搶先體驗，對應平台為 PC Steam，支援繁體中文，會持續更新追加更多內容。