最近推出嘅「正牌」恐龍 Game 係經營模擬類遊戲《侏羅紀世界：進化 2》，雖然有得放啲恐龍出黎咬遊客，但又點及得上自己操作恐龍噬人咁爽。之前喺 PC 及手機平台推出嘅《Path of Titans》終於出埋落家用機，日前仲正式展開 CBT 封測，係時候入場咬咬啦！

《Path of Titans》由澳洲獨立團隊 Alderon Games 開發，係一款線上多人動作生存 MMO 遊戲，採用第三身視點，開放世界。玩家將操控恐龍探索狩獵，喺充滿複雜 AI 生物以及最多 200 位由其他參與者所扮演恐龍嘅世界中，尋找生存定位並想辦法避免死亡。當中包含各種挑戰任務等 RPG 要素，努力提升自己能力參與恐龍間激戰並成為霸主。

暫時恐龍數量有 25 種，每條龍都有自己獨性同技能，亦可以升級技能、能力。外觀可由玩家自定，包括造形、膚色、標誌等等，鍾意嘅話可以 Set 到迷彩，行入森林有保護色……。玩法除咗打交之外，可與其他玩家組隊，收集材料製作巢穴、捕捉稀有生物等等，有時更會出現高難度世界事件，完成後會有稀有獎勵。

《Path of Titans》PC、iOS 及 Android 版本已經推出，Xbox Series X|S、Xbox One、PS5、PS4 版本就已於 7 月 27 日開始 Beta Test，Nintendo Switch 版本則於今年夏季發售。特別一提，官方話所有版本都可以進行跨平台連線。