又有一款多人 PvPvE 遊戲推出，不過今次就有啲特別，打敗強大敵人後可將之收服，再派佢為己方而戰。新作《SYNCED》由玩家組成隊伍掃蕩地圖上嘅怪物及其他隊伍，早前進行完第一次封測，反應都唔錯，可以一戰。

《SYNCED》由 NEXT Studios 開發，係一款 PvPvE 射擊大逃殺遊戲，採用第三身視點，支援三人線上合作。背景設定為未來末日世界，人類因為經歷浩劫而大幅減少數量並步向滅亡，主要原因係被稱為「Nano」嘅先進技術。雖然呢種技術令人類趨向滅亡，但係有部份倖存嘅人類有能力與「Nano」同步並使用佢地。呢班人類被稱為「Runner」，相互喺末世爭奪剩餘嘅資源。

戰鬥部份以射擊戰為主，但係都有刀呢類近戰武器，玩家將會分成三人一隊上陣。場上會遇到各種「Nano」敵人，部份擊敗後可與之同步變成我方強力伙伴。可同步嘅「Nano」有各種型態，例如有衝鋒陷陣型「Crusher」、擅長遠距離攻擊型「Suppressor」、坦型「Guardinan」、偵察潛行型「Seer」等，因應自己玩法再收服相關類型「Nano」，就係本作嘅重心玩法。

雖然屬於食雞型遊戲，不過就唔係死咗就要 Quit Game，被擊倒後會瞓喺地下一段時間，隊友喺呢段時間可以復活你，萬一死咗都唔怕，每人都有三次機會，大大增加容錯率。玩法亦係去指定地點搶奪資源，完場時得到最多果隊勝利，再唔係殺人至上。另外場上亦會有可獲得強化能力、武器及裝備嘅基地「Haven」，搶先去升級定係潛伏於附近殺人都係戰術之一。

《SYNCED》預計於 2022 年內推出，對應平台為 PC Steam，之後仲會有測試，詳情請留意佢地嘅 Twitter。