現時賽車遊戲越黎越真實，不過對舊世代機迷黎講，喺日本高速公路同其他車手鬥快嘅《首都高 Battle》，飄移飄到個地下無摩擦力嘅《Ridge Racer》，仍然係佢哋鍾愛嘅賽車模式。有晒以上兩種特點嘅新作《Kanjozoku Game Racer》係早前推出，短短時間已得到「極度好評」評價，回到大家懷念嘅九十年代，飛馳於日本高速公路，爽！

《Kanjozoku Game Racer》由 SG developer 開發，係一款賽車遊戲，支援多人線上連線。玩家將置身於九十年代，於晚上嘅阪神高速公路與其他玩家對決。根據資料，遊戲名稱「Kanjozoku」似乎係實際喺阪神高速公路 1 號環狀線上狂奔嘅人通稱，幾型仔。

遊戲中出現嘅車輛都係 90 – 2000 年代知名日本車，包括豐田 AE86、萬事得 RX-7、日產 Skyline GT-R 系列等，都係大家耳熟能詳嘅車。當然玩家仲可以自行設定發動機、渦輪增壓器、燃油、進氣、排氣等，改變汽車性能；外觀亦可以自由改變，甚至可上載 JPG 設計自己嘅拉花，型爆公路。

玩法方面，會分為 STREETS 同 TRACKS 兩種模式。喺在 STREETS 模式以阪神高速公路為賽道，賽車同時避開路上其他車輛以及逃避警察追捕。TRACK 模式下，會轉為寬敞嘅道路，主要玩飄移過彎，暫時有三種路線選擇。順帶一提，喺呢個模式下可轉換至離線模式隨心所欲地飄移飄到爽。

《Kanjozoku Game Racer》已經推出，並會持續更新加入更多車輛等內容，早前就加入 RX7 RC、一對一 PvP。暫時只有 PC Steam 平台。