雖然近年講釣魚 Game 好多人都會以為講緊機舖入面果啲，但實際上仲係有講求真實嘅釣魚 Game 出。即將推出嘅遊戲《Call of the Wild：The Angler》以擬真釣魚為題材，力求重現真實垂釣體驗，仲可以成班人一齊釣，正！

《Call of the Wild：The Angler》由 Expansive Worlds 開發（曾開發擬真打獵 Game《theHunter：Call of the Wild》），係一款擬真釣魚遊戲，採用開放世界，最大支援 12 人連線。由於本作力求真實，所以除咗核心釣魚嘅部份，事前要選擇釣竿、捲軸、魚餌、魚鉤、魚線等裝備。根據水溫、深度、高度等去確定魚類位置，再因應不同魚種獨特行為及特徵，選擇適合嘅裝備挑戰，令玩家有親歷其境嘅釣魚體驗。

本作採用開放世界，玩家將置身於龐大嘅野外世界，你可以步行、坐越野車、坐船穿越廣闊水域探索。當中有蜿蜒河流、雄偉高山、史詩般嘅遠足小徑、隱藏嘅池塘等等。與最多十二人共同喺生機勃勃世界中尋找各種魚類，或者懺悔（！？）。

《Call of the Wild：The Angler》將於 8 月 31 日推出，對應平台為 PC Steam、Microsoft Store 及 Epic Games Store。