食鬼（Pac-Man）超歷史悠久，大家對佢嘅印象都係食豆，比鬼追就食大力丸追返佢轉頭，但原來好耐之前係出過一隻 3D 動作遊戲（玩過嘅應該都係一百蚊七隻…….），近日更會重製以新面貌推出。早前我哋有幸參與過實機試玩，發現玩落幾有挑戰性仲幾唔錯，仲有幾分《Super Mario 3D World》味道，啱晒想玩有難度遊戲嘅朋友。

《PAC-MAN WORLD Re-PAC》係 1999 年推出嘅《Pac-Man World》重製版，係一款 3D 動作冒險遊戲。今次重製版真係將舊作所有野重新做過，唔係求其將畫質 Upgrade 到 4K 就算，雖然玩起上黎有少少古早味，但遊玩性絕對唔差。最正嘅係新版終於有繁體中文，就算玩過舊作都值得買黎收藏。

故事就講述邪惡機器人「Toc-Man」綁架咗 PAC-MAN 成家，然後就梗係殺過去救人果類野啦，呢類遊戲個重點都係遊玩過程勝過一切。PAC-MAN 有掉豆、衝刺、跳躍等見慣見熟嘅動作，但因為係立體遊戲，畫面深淺都要兼顧埋，特別係 Boss 戰好似《Mario》咁要靠特定方法打（例如去指定位置踩大炮射隻王），係幾有趣。

一般關卡以動作冒險型式玩，同時又會有賽車關卡、變成飛機射擊 Game 關卡，又會以不同面貌重現經典版本「食鬼」，玩法豐富。最精彩嘅係新版以超級親民嘅價錢（一字頭咋……），當係童年回憶又好，同小朋友玩又好，支持新作又好，都係抵到爆炸，8 月 25 日推出，對應平台 Xbox Series X|S、Xbox One、PS5、PS4、Nintendo Switch 及 PC Steam。