克蘇魯神話恐怖 Game 總係有份神秘嘅吸引力，就算明知隻 Game 有陣伏味你都會想開黎試下（講緊邊隻自己諗啦……）。黎緊又有一款新作《Eresys》係玩克蘇魯，睇片就幾似樣，遊戲設定所有敵人都有學習能力，伏唔伏就未知，但係似乎值得一試。
《Eresys》由獨立遊戲開發者 Ares Dragonis 製作，係一款恐怖動作解謎遊戲，採用第一身視點，支援最多四人連線。遊戲以 H.P. Lovecraft「克蘇魯神話」為題材，故事講述一個被驅逐嘅邪教徒，佢喺教團入面偷咗本書，意外地開啟一道傳送門，令不明嘅邪惡氣息降臨至與世隔絕嘅小島上，令整個島上嘅居民死亡。奇跡生還嘅玩家必需與隊友探索整個島嶼，還原被偷嘅書本歸還原處，並進行儀式封印傳送門，努力去平息一切……。
遊戲玩法基本上係不斷地喺小島上探索，收集儀式相關物件、書本缺頁、線索，當然仲有大量怪物潛藏於黑暗中等緊你。本作最大嘅特色係所有怪物都會設有 AI，會根據玩家行為而產生新嘅應變方式對付你，即係會越黎越難玩。幸好，你知道呢啲怪物都係怕光，只要點起兩盞油燈就係生存必勝法門，問題係……你要準備定補充嘅燃油……。
《Eresys》未有實際推出時間，對應平台為 PC，現時已經喺 Steam 開啟商店頁面，之後亦會喺 Kickstarter 上進行募資活動，有興趣嘅玩家留意啦。
動漫電玩宅，極愛金田一系列，擅長動作及策略遊戲