《哈利波特》所描寫嘅魔法世界有令人嚮往，即將推出嘅新作《Witchbrook》就比玩家進入尤如《哈利波特》嘅魔法世界，同時又好似《星露谷物語》同其他人交流做朋友甚至結婚生仔，想感受魔法學園與城鎮悠閒生活就要留意啦。

《Witchbrook》由獨立遊戲工作室 Chucklefish 開發，係一款生活模擬角色扮演遊戲。玩家將扮演一位受訓中嘅魔法學徒，踏上一段學習魔法嘅成長冒險之旅，過程中你需要喺繁華海濱小鎮中生活，結交朋友尋找愛情，並幫助他人實現夢想，同時尋找失落嘅祕密（簡單講就係哈利波特溝魔女宅急便）。

遊戲分成兩部份，日常玩家要去魔法學院上堂，完成課堂、作業會加強你嘅魔法能力。你可以喺城鎮中使用魔法、製作魔法藥水、更可以與同學進行飛天掃帚比賽鬥快，亦可以利用學到嘅植物學知識去培育各種植物，當然亦可以用魔法掃帚便利功能去幫鄰居送貨，內容頗為豐富。

另一部份就係城鎮生活，你會喺遇到各式 NPC，與佢哋成為朋友或者進行浪漫約會，當你與對方相處得越耐，佢哋就會慢慢對你敞開心扉，解鎖角色們獨有故事、希望及夢想。每逢有季節性活動你更可以一同慶祝享受當地美食，亦可參與園藝、攝影等活動，閒時又可以翻新自己林地小屋，美化成植物與動物棲息地，努力參與令自己沉浸於魔法世界。

《Witchbrook》未有正式發售日期，對應平台為 PC Steam，支援多人線上遊玩。