身為香港機迷，大家都係飲 PS 奶水大，我都唔例外。由 PS1 年代開始，每部機都買，尤其係以前 PS 遊戲創意滿滿，雖然仲係學生哥，但係 PS2 年代開始就決定行返正路玩正版去支持自己心愛既遊戲機，更一度認為 PS 係自己最好夥伴，對我呢類玩家不離不棄，所有決定都係以機迷為先。直到 PS5 買唔到機加上種種政策令我憤而轉會，了解更多後令我醒覺 PS 已非我所認識的，所以投稿呢篇文章，希望仲迷失緊嘅 PS 機迷認清事實醒覺！

戴咗頭盔先，我唔係鼓勵大家仇視 PS，反而係因為對 PS 有愛，希望佢痛定思痛，結合大家既力量令 PS 諗返機迷先應該係第一位。

以前，我為 PS 系統自豪，Party 令玩家們安坐家中，一齊傾住計打機，陪伴我渡過好多快樂時光；獎盃系統令我有動力去鑽研更多遊戲刁鑽玩法；PS+ 每個月送遊戲令我感到廠商嘅慷概。一切美好既事物，隨住 PS 政策改變，令我醒覺原來事實並非如我所想般美好。

令我轉會契機同好多人一樣，主要有兩個原因：1. 抽唔到 PS5（後來有抽到）  2. PS+ 升級事件。

第一個原因大家都明，但我都想講下我抽咗成年先抽到一部，有朋友次次 Aeon、The Club、PS 自家都有抽，咁耐都無中過，唔好講咩好易抽中。再講，有一班支持你多年玩家，唔係應該有特別渠道令佢地盡快有新機打咩？只要抽部份機講明起碼要有創立 3 年以上兼有 PSN+ 帳戶先可以抽即可，最低限度可確保係真正玩家買機而非炒家，唔係走去送機比一班唔打機 KOL 刷存在感。

PS+ 升級事件就更痴線，之前幾次特價我都有買年票，有新訂閱服務一望個價錢要成千蚊，我以為自己眼花，之後再睇報導先知道係 PS 要割韮菜，加上之後聲稱話係系統錯誤企圖以大話去掩飾，完全侮辱玩家智慧。由果刻開始我就決定轉會，仲好快就買到 XSX，之後更令我睇清現實到底係點。

Xbox 係點我就唔多講，廢事比人話我打手，只係想話並唔係坊間所講「無 Game」。其實而家除咗獨佔大作，大部份遊戲都係多平台，日系遊戲亦都有。我想講嘅係自從買咗 Xbox 之後，了解多咗遊戲主機世界，先發現自己係幾咁無知，幾咁井底。

不單止日系遊戲，其他遊戲好多都有晒雙平台。不過如果你口中日系係講緊《TLOU》、《蜘蛛俠》、《戰神》既咁你不如食屎啦。

朋友介紹之下，睇咗得獎 Xbox 自嘲紀錄片，先知道原來 Party 系統同獎盃系統都係「抄」自 Xbox，PSN+ 升級訂閱遊戲服務更明顯係抄自 Game Pass，就連早排公佈「PlayStation Stars」獎勵系統都係抄「Microsoft Rewards」，所有野都係靠抄就同某國一樣，非常肉酸！

「抄」核突都算，系統越整越差先係問題，單係講 Party 系統更改已經令人摸不著頭腦。以前 Party 系統撳入相關頁面，有咩朋友開緊 Party 一目了然，好多時入到 Party 都會見到新朋友加入，久而久之大家朋友圈子擴闊。但係之前經過一輪更改後，一般派對除非有人邀請咗你，否則你係唔會見到任何線上派對，即使係頻道派對都要自己撳入去 Check 先會見到。Party 原意係想更多人一齊玩，咁改完之後就變到勁封閉，不知所謂。

系統令人失望，廠商態度亦不敢恭維。本來 PS 最吸人其中一個要素係自家優質遊戲，以前《蚊》、《Tokyo Jungle》、《Arc the Lad》、《I.Q》、《捉馬騮》等等，好 Game 多到廿隻手指數唔晒。去到今時今日呢？《TLOU 2》加一堆LGBTQ 左膠元素，逼玩家玩猩猩，然後 PS 仲瘋狂讚 Neli 做得好，黎緊隻《God of War》仲預告埋搞 Gay，即係不停測試玩家底線？然後有隻叫做「過得去」既遊戲就不停出唔同版本殮財，不如再無誠意Ｄ？都唔講你《GT 7》神級呃錢了。

遊戲首要條件唔係比玩家有好體驗，而係滿足一己變態癖好，Sony 有責任，但更大責任係不停吹棒，食屎都拍手話好食既玩家。被踢爆收買媒體評分、推出幾年都淨係講頭幾日銷售數字誤導玩家、假 Trailer 等等，然後玩家們因為買隻 Game 只係幾舊水甚至特價 $99 就走去買，有你地俾錢充撐呢個經濟體，自然繼續比屎你食。

繼《TLOU2》之後，《GT7》一樣係買分。

最後想講，鬧咁多係希望玩家們以行動去令 PS 回歸初心，你推出遊戲機係要討玩家歡心，我地只係關心有咩好遊戲推出，遊戲體驗好唔好，真玩家先唔會關心「邊個邊個明星有機，好潮」，我地想要既係以前用心對玩家既 PS，希望你總有一日醒覺，記得玩家先係你地真正客戶。（唔係講緊果堆比屎你食都話好既玩家）