市面上嘅喪屍 Game 絕大多數都係玩家扮演人類人方，喺喪屍世界入面殺殺殺努力生存，又或者分成人類同喪屍兩邊互殺，但係今次介紹嘅新作《Paradize Project》就有啲唔同，因為佢係嘅喪屍係可作為勞力或戰力協助你，甚至可以話係最有力嘅幫手，概念幾過癮。

《Paradize Project》由 Eko Software 開發，係一款包含動作冒險及建造模擬嘅生存遊戲，採用第三身視點，開放世界，支援多人線上 / 線下合作。遊戲發生喺一個喪屍橫行嘅末日世界，但係一班聰明嘅倖存者發明咗一種控制喪屍嘅技術，透過喪屍嘅幫助逐步重建人類世界。

遊戲分為建造、戰鬥兩大部份，前者當然係建造各種設施提供食物、住所等玩法，後者就係外出探索新區域、蒐集材料、打被感染嘅大象 Boss 等等（戰鬥以射擊戰為主）。不論係邊個部份都可以委派被控制嘅喪屍協助工作，例如負責採集、耕作等工作，亦可以比武器佢哋帶埋出去戰鬥，以喪屍對喪屍。根據官方資訊，雖然喪屍被玩家所控制，但係呢種技術有啲唔穩定，由於暫時未有更多資料，所以未知會以咩方法呈現，可能係戰鬥時突然失控打返你轉頭都未定。

《Paradize Project》預計於 2023 年 12 月推出，對應平台為 Xbox Series X|S、PS5 及 PC Steam & Epic Games Store，支援繁體中文。