捉黃腳雞呢樣野不論咩地方咩時間都係歷久不衰嘅活動，黎緊即將推出嘅新作《My Divorce Story》（我的離婚故事）就專玩呢樣野，最正嘅係入面嘅故事並唔係憑空吹出黎，因為製作者本身就係離婚律師，日常工作生活就係佢嘅素材，夠晒有真實感！

《My Divorce Story》由韓國獨立團隊 NONIL STUDIO 開發，係一款平面冒險遊戲，採用可愛手繪風格。故事講述喺結婚後過住平凡嘅生活（可選擇性別），直到有一天收到神秘訊息，入面話你另一半有婚外情，之後逐步尋找出軌證據，並以順利達成離婚為最終目標。

由於製作者本身係離婚律師，所以故事會有大量根據現實生活中婚姻諮詢個案改編而成，而且亦會根據韓國法律基礎去進行證據收集，即係發現外遇後六個月內提出訴訟，先會構成離婚理由。遊戲基本核心就收集證據，例如屋入面突然出現未見過嘅事物、查看信用卡帳單、電影戲飛、安裝 GPS 追蹤器等等，甚至係突然改變習慣，即係唔聽電話之類，但同時又要同對方保持良好關係，非常真實。

除咗上述手段，玩小遊戲都會得到唔少證據，例如喺對方瞓覺時檢查手機、短時間內破解電腦密碼、觀察日常對話等等，覺得有問題的話仲可以進行「提問」、「發爛渣」、「懷疑」去得到更多情報。根據玩家喺遊玩過程中得到嘅情報、配偶親密度以及資金多寡，將決定幸福、不幸定係其他幾個驚喜結局。

《My Divorce Story》將於 8 月 18 日推出，對應平台為 Nintendo Switch 及 PC Steam。