上星期出咗一款恐怖遊戲《FOBIA – St. Dinfna Hotel》，坊間唔係太多人知道有隻咁嘅遊戲，但係整體質素非常唔錯，而且玩法同體驗比起《Biohazard 7》絕對唔會遜色，短短時間已經有「極度好評」評價，值得一戰！

《FOBIA – St. Dinfna Hotel》由獨立工作室 Pulsatrix Studios 開發，係一款恐怖動作解謎遊戲，第一身視點。聖丁菲娜酒店（St. Dinfna Hotel）係一間謠傳發生過無數神秘失踪案件同超自然活動嘅破敗酒店，並且有消息話佢係邪教嘅根據地，玩家所扮演嘅記者 Roberto 決定親身去探索謠言嘅真偽。

本作最特別嘅地方係玩家會有一部可顯示不同時間線嘅相機，可以與過去、現在及未來嘅時間線互動並藉此解決謎題。喺探索中會發現大量隱藏通道、道具、謎題，喜歡探索嘅玩家一定滿意，謎題難度亦唔算好高，不過暫時喺顯示道具似乎有 Bug，有時會睇唔到互動選項。

戰鬥部份就類似《Biohazard 7》，武器有手槍、霰彈槍、步槍、左輪四種，亦可以升級槍械。可惜嘅係頭目戰難度偏低，尾王攻擊模式甚至非常單一，算係敗筆。最後遊戲有雙結局，耐玩性算係合格，特別係以獨立遊戲黎講絕對收貨，如果你鍾意玩《Biohazard 7》應該都啱玩。

《FOBIA – St. Dinfna Hotel》已於 6 月 29 日推出，對應平台為 Xbox Series X|S、Xbox One、PS5、PS4 及 PC Steam，支援繁體中文。