邪教呢樣野喺香港其實一直都存在，例如早幾年就有個打住政治旗號嘅邪教荼毒唔少人心靈，早排更有位歌手被發現加入邪教添。新作《進擊羔羊傳說》（Cult of the Lamb）玩一手一腳由零創立邪教，但係就用可愛風格包裝，好鬼過癮。

《進擊羔羊傳說》（Cult of the Lamb）由 Massive Monster 開發，Devolver Digital 發行，係一款有 Roguelike 元素動作冒險建造遊戲。玩家所扮演嘅羔羊快將被行斬首之刑，千均一發之際得到邪神力量附身，並以此力量擊敗一眾敵人並得到一班階下囚嘅敬仰。得到邪神之力後，羔羊決定以「師尊」之名，建立專屬於自己嘅邪教，廣納信眾排除異己。

要發展邪教第一件事梗係招收信眾，深入隨機生成嘅古老地下迷宮，擊敗假先知救出新嘅動物，帶佢返根據地後就灌輸信仰招佢入教成為追隨者，慢慢擴大人口。有人手之後就要喺根據地建造各種建築收集資源提供食物，亦要訂立教條、每日開佈道會滿足佢地精神層面。當持續令信眾感覺滿足就會加深佢地信仰，可以汲取嘅力量就越多。

當然，有人會滿足自然有人會不滿，當持續感到不滿嘅信眾就會開始造謠，煽動其他人離教。你可以選擇對不信者重新洗腦，或者將佢獻祭比邪神。基本上遊戲分為戰鬥同經營兩部份，前者主要係入地下迷宮又或者擊敗敵對邪教領袖，玩法就類似《Hades》，有得放技能、換武器，靠走位同翻滾避招。後者就同一般經營類遊戲差唔多，都係種下田、煮食、舉行宴會等等，玩法偏簡單。

《進擊羔羊傳說》將於 8 月 11 日推出，對應平台為 Xbox Series X|S、Xbox One、PS5、PS4、Nintendo Switch 及 PC Steam，支援繁體中文。現已開放預購，售價 HKD $128 元，預購者將獲得限定克蘇魯追隨者外觀。