【遊戲介紹】平面像素塔防新作《Necrosmith》拼湊身體不同部位召喚組合死屍

死靈法師係咩我諗應該唔需要介紹，話晒喺唔少動畫、遊戲中都有出現，不過多數都係單純地復活死人。今次介紹嘅新作《Necrosmith》就將「復活」呢樣野玩新花樣，因為玩家可自行組合死屍各個部位，拼湊出奇怪嘅生物，玩落真係幾過癮！

《Necrosmith》由 Alawar Premium 開發，係一款平面像素塔防遊戲。故事講術死靈法師喺塔中進行儀式，突然間外邊漆黑一片烏雲密佈，當再睇到野時就發現去到一個陌生世界，仲有怪物向你步步進逼，面對呢個情況就梗係立即復活死屍為自己而戰，順便搵出離開呢個世界嘅方法。

玩法基本上類似一般召怪塔防，都係喺 Base 度召怪出黎打人，不過由於角色係死靈法師，自然係玩復活死人。要復活死人就需要有素材，素材分為頭、身體、左手、右手、左腳、右腳六個部位，只要填滿每個部位嘅空格就可以進行召喚，而且不計種類。例如你可以用法師骷顱頭、戰士殭屍身、重甲獸人手（魔法杖）、螳螂怪手、蜥蜴人腳、哈比鳥腳，合成做一隻唔知咩生物出黎（甚至有機械人零件），攻擊方式同數值就會跟返每個部位去計算，夠晒亂黎！

召喚出黎嘅怪物會自行尋找敵人攻擊，玩家亦可以手動控制，不過就只限一隻，建議放喺基地附近進行防守。四處尋敵嘅怪物會有機會發現各種建築物，例如增加每日屍體部位數量嘅基地、生產資源嘅礦場等等，目標係搵出敵人嘅據點擊破。另外，怪物亦有機會搵到升級設計圖，當儲夠資源就可以升級基地獲取不同 Buff，例如強化骷顱類速度、殭屍類血防等等，基本上都係針對自己資源同玩法進行強化。