大受好評湊細佬逃命 Game《瘟疫傳說》續集《瘟疫傳說：安魂曲》（A Plague Tale: Requiem）早就宣佈會喺今年推出，但係就遲遲都未有確實日期。大家唔洗再估估下啦，因為琴日放出黎嘅最新實機影片中已有確實推出日期，十月開打！

《瘟疫傳說：安魂曲》（A Plague Tale: Requiem）由 Asobo Studio 開發，係一款動作冒險遊戲，採用第三身視點。故事以中世紀鼠疫作為引子，細佬 Hugo 因為擁有控制老鼠嘅特殊能力而受到追殺，今集自然係繼續 Amicia 同 Hugo 嘅逃命之旅，時間點係上集無幾耐之後，舞台則去到南方預言中嘅島嶼，希望喺呢度搵到方法解開 Hugo 身上嘅詛咒。

喺新影片中見到 Hugo 嘅能力比上集更強，新能力可透過老鼠感應人類血液定位，類似蝙蝠聲納定位咁，對匿藏逃跑大有幫助。另外，Amicia 終於可近戰暗殺，亦有更多投石、投罐種類，例如新加入嘅煙彈 / 罐，可短暫奪去敵人視力，仲有新增武器十字弓，可一擊殺敵。

除咗揭開新道具、新技能面貌，喺片尾仲公佈埋正式推出時間。《瘟疫傳說：安魂曲》（A Plague Tale: Requiem）將於 10 月 18 日推出，對應平台為 Xbox Series X|S、PS5、Nintnedo Switch 及 PC，支援繁體中文，並會於首日落 Xbox Game Pass。