三個月前公佈嘅 Capcom 新作《Exoprimal》，喺琴晚嘅「Capcom Showcase」直播發表會最新宣傳影片，帶來更多遊戲情報及實機畫面，同時更宣佈將舉行封閉網路測試，即日起喺官網開放申請。

《Exoprimal》由 Capcom 製作，係一款線上專用團隊對戰動作遊戲，採用第三身視點，最大支援 10 人線上協力對戰。遊戲舞台設定於 2043 年，世界各地都發生「恐龍爆發」，會憑空出現大量恐龍並四處襲擊人類。為咗對抗佢哋，人類開發出可預測「恐龍爆發」地點嘅新型 AI「利維坦」，以及強大嘅動力裝甲「強攻裝甲」獵殺恐龍。

「強攻裝甲」可分為三大類，分別擔任負責輸出嘅前鋒、負責坦同吸仇恨嘅護盾、負責回復及施加 Debuff 嘅支援，而且可於戰鬥中隨時切換裝甲以應付不同情況。現時公佈嘅裝甲分別有前鋒火力強化型「火網」、遠距狙擊手「天眼」、汎用型「神射手」、高速格鬥型「疾風」。坦暫時只有「路障」，支援角色則只有「巫醫」，不過喺之前嘅影片就有見到漂浮於空中嘅魔法師，所以肯定之後一定會有更多裝甲使用。

遊戲提供不同模式，但主要模式「恐龍生存戰」就係玩鬥快完成 AI 「利維坦」提出嘅任務，兩隊玩家可視情況協力對抗又或者直接擊殺敵隊。任務類型分別有討伐指定恐龍、保護垂直起降戰機、護送資料密鑰至目的地（可攻擊妨礙對手隊伍資料密鑰）、用奧米加戰錘破壞目標物件、與對手隊伍戰鬥收集能量、討伐擁有壓倒性攻擊力新型暴龍六種。當完成「恐龍生存戰」後，不但可推進故事劇情，更可獲得經驗值、強化配件等報酬。

今次新影片展示咗實機畫面，老實講打擊感出期地差，特別係格鬥打中敵人猶如打空氣一樣。另外，當出現恐龍暴走潮，畫質明顯降低兼有 Drop Frame 問題，希望喺封閉網路測試時可以解決呢個問題，否則玩家評價都幾難同個「伏」字脫離關係。

《EXOPRIMAL》預計於 2023 推出，對應平台為 Xbox Series X|S、Xbox One、PS5、PS4 及 PC Steam，即日起已可於官網申請封閉網路測試資格。