琴晚淩晨由微軟舉辦嘅「Xbox & Bethesda Games Showcase」遊戲發佈會入面，驚現有「小島神」之稱嘅日本知名製作人小島秀夫，除咗宣佈會同微軟合作外，更提及將會有一款全新作品開發中嘅消息，影片公佈後網上出現一片哀號，唔少人更直指小島背叛 Sony，情況令人意外。

影片中小島秀夫表示現時正在製作一款全新遊戲，而且係需要用到最先進嘅雲端技術，並且業界趨勢轉變後先做得到，係自己一直都想做並且從未有人見過嘅新體驗遊戲。與 Xbox 遊戲工作室合作，將可以將自己概念現實化，希望未來會為大家帶來興奮嘅新消息。

雖然目前未有相關企劃嘅具體內容，但係網友們已經議論紛紛，呼聲最高嘅就係早前傳聞中嘅恐怖遊戲《Overdose》。雖然大家都係得個估字，但係日前 PlayStation 支持者就發起「取消小島秀夫 Xbox 獨佔遊戲」簽名行動，企圖動用群眾壓力去令小島讓步，不過搞一大輪都係得千幾個簽名。

另一方面，網上有唔少聲音指小島背叛 PlayStation，例如話佢成立工作室時有賴 Sony 嘅支持，更甚者就話沒有 PlayStation 就唔會有今日嘅小島。不論事實係點，其實早喺今年四月已見端倪。當時 PlayStation Twitter 出咗條 Tweet，列出自家旗下 Studio，當中包括 KOJIMA PRODUCTIONS。然後小島就非常快速地 Retweet 並寫上「為免誤會，小島製作仍然係獨立工作室」。喺商業社會，一般合作單位如果出現上述分岐，大部份情況下都係會私下解決，好似小島咁直接公開講，其實已經係表達非常強烈嘅不滿，所以今次嘅同微軟嘅合作似乎變得更合情合理。

I'm sorry for the misunderstanding, but KOJIMA PRODUCTIONS has been and will continue to be an independent studio. //t.co/2M0n4ogRaa

— HIDEO_KOJIMA (@HIDEO_KOJIMA_EN) April 15, 2022

其他相關文章：

【遊戲新聞】Xbox 遊戲發佈會 多達三十多款作品一文睇晒

【遊戲新聞】光榮全新三國暗黑動作遊戲《Wo Long: Fallen Dynasty》Xbox 獨佔推出首日落 Game Pass

【遊戲新聞】《底特律：變人》前資深員工領軍開發《As Dusk Falls》可多人互動劇情遊戲今年上市

【遊戲新聞】太空科幻版本的上古捲軸《Starfield》自由度耐玩度均為 100％ 的野心作品