相信每個小朋友都曾經幻想扮演手上嘅玩具，與其他玩具進行大戰，而《Toy Story》嘅出現，就令大家對玩具視角更為了解。已推出兩年嘅作品《HYPERCHARGE: Unboxed》，雖然香港無乜人講，但係 Steam 去到現時仍然係「極度好評」評價，玩嘅正正就係要玩家化身為玩具，對抗海量玩具敵人嘅作品，完美地滿足兒時夢想。

《HYPERCHARGE: Unboxed》由 Digital Cybercherries 開發，係一款動作射擊塔防遊戲，可選擇第一或第三身視點，支援最大四人連線合作。玩家將化身為玩具士兵，以玩具視角進行戰鬥，所以周遭嘅物件都會變得非常巨大，就好似入咗巨人國咁。同時製作團隊為咗令大家更有「玩具」Feel，不論玩家角色定係敵人都好「膠」，身上嘅細節同背景都做得非常認真，每將地圖都會有可供探索嘅彩蛋。

勁「膠」

遊戲分類雖然算係塔防，但係就同《Fortnite》類似，將射擊同建造防禦設施融合，分別係地圖無咁大，同埋更考團隊合作。主要玩發係保護地圖上嘅核心裝置，抵禦一波又一波嘅敵人來襲。由於敵人係四方八面襲來，加上數量非常龐大（敵人種類都幾多元化，由遙控坦克到爆旋陀螺都有），所以幾位玩家要分工合作建造防禦設施，角色防守嘅方向等等，講求合作性同時極具挑戰性。

雖然玩家可以起超大量嘅防禦設施，但除咗最低難度，防禦設施主要都係輔助為主，主力殺敵嘅仍然係玩家所操作嘅角色，因此玩家手上嘅武器就變得重要。喺每回合結束時，玩家可用關卡中掉落嘅金錢去買新零件，有啲係加強穩定性、鎖定；有啲係強化升級槍械，又因為唔同武器適用於不同敵人，所以最好夾下每位玩家用咩。順帶一提，遊戲中嘅敵人係可以進行部位破壞，成功破壞後會掉落零件，喺完場前都會 Keep 住留喺場上面，成件事變得更像真。

《HYPERCHARGE: Unboxed》已經推出，對應平台為 Xbox One、PS4、Ninetendo Switch 及 PC Steam & Epic，支援繁體中文。