由獨立遊戲開發者 John Pywell 製作嘅平面探索動作遊戲《FOUNTAINS》，有爽快嘅動作、對技術有需求嘅戰鬥、富挑戰性頭目戰。預計將會配合 Steam 新品節推出遊戲試玩版，對平面動作有興趣嘅朋友留意啦。

《FOUNTAINS》採用俯視視角，玩家將扮演一位反抗邪惡政權嘅勇武派，但係失手被擒。想辦法逃脫後，希望得到傳說中可令人長生不老嘅青春之泉力量去打倒帝國，但係邪惡嘅使者正正就係要殺死所有知道青春之泉秘密嘅勢力。玩家就要喺呢個情況下，努力強化自己擊敗自己面前所有敵人。

戰鬥部份同極好評作品《Hyper Light Drifter》（光明行者）相似，分為近戰、遠攻兩種組合。近戰主要靠走位攻擊、翻滾迴避，遠攻則依靠各種類型魔法，部份效果幾有型，例如有招魔法就甚有《Dark Souls》靈魂激流味道。

遊戲設有成長元素，旅程中會搵到新嘅工具或解鎖新能力，慢慢會有更多招式配合自己玩法。戰鬥以外，暫時已知可於海邊釣魚、礦坑中可以玩越礦飛車。路上亦會遇到各種 NPC，有敵對的有友好的。另外，世界各處都有隱藏起來嘅祕密（類似《Dark Souls》隱藏牆），有時會係物品有時係秘道又或者可供休息嘅水泉，呢啲元素令人不期然同魂系遊戲連上關係。

《FOUNTAINS》預計於 6 月 13 日配合 Steam 新品節開放試玩版，可以先將之加入 Wishlist。