三月頭推出，我哋都介紹過嘅《雙子星：盛氣淩人》（Young Souls），雖然係細廠出品，但係遊戲質素非常之好，基本上係一玩就上癮。原因好簡單，就係每個細節都做好，不論過場動畫、戰鬥系統等等全部一絲不苟，令人一玩上癮，亦都值得我哋再寫一篇評測向大家推廣一下呢款佳作。

由法國開發商 1P2P Studio 製作，係一款橫向動作角色扮演遊戲，最大支援單機二人合作（無連線合作非常可惜）。玩家需操作一對孖生姐弟，去地下世界救出被哥布林所擄走嘅繼父教授。遊戲畫面偏向卡通風格，但係流暢度高，打擊感、判定等都做得唔錯，以一款動作遊戲黎講呢幾樣野做得好已經係成功一半，加上作為核心嘅戰鬥系統吸取其他同類型遊戲嘅優點，喜愛呢類遊戲嘅玩家好難唔中。

遊戲主要分為地底世界冒險（戰鬥）以及地上小鎮（角色扮演）兩個區域，地底世界基本流程都係打怪打 Boss 刷素材開箱拎裝備，地上小鎮部份就主要係買賣及強化裝備，以及去健身室強化能力。通常呢類型遊戲要強化角色能力都係求其撳幾粒制就算，但係本作去健身室強化係要玩小遊戲的，而且要升級唔同能力要玩嘅小遊戲都唔同，仲幾有難度下（拎 5 星要接近零失誤），無 Hea 玩家值得一讚。

先講戰鬥系統部份，明顯有參考魂系遊戲元素，例如各類型武器有唔同嘅攻擊範圍、速度、連擊數等，全身裝備亦會有總重量，越輕角色越敏捷，越重就越慢相對防越高，而且分別係非常明顯。因為呢個系統，一般會將兩姊弟培育成不同類型角色，我就將弟弟練成速度敏捷型，姐姐就係重防磨血型，咁就可以針對不同敵人應對所有情況。

玩家嘅攻擊分為普通攻擊、跳躍攻擊及必殺攻擊；防守就分為普通防禦、盾反以及閃避，而製作團隊喺攻防收益上作出非常好嘅平衡。攻擊部份，以輕武為例，可以普攻 2 – 3 Hit 派生 ↑ 攻擊令敵人浮空，再跳起連技追擊打一套；重武則可以派生 ↓ 攻擊強制令敵人倒地製造走位空隙，更有奔跑攻擊及奔跑跳躍起手嘅連技，玩法因人而異。

防禦部份用普通防禦的話，會扣減盾嘅血量，扣到零就會倒地兼暈，所以爆盾前要走位回盾。更高階嘅技巧係盾反，只要喺敵人攻擊就打中你時按擋格就會使出盾反，成功的話會直接進入 Bullet Time 並儲畜必殺技糟，打 Boss 極好用（敵人攻擊前成個身會發光，好易睇）。至於閃避除咗最基本有少量無敵時間外，更可以取消攻擊硬直，而且閃避時按攻擊的話，動作更會有所不同。另外由於係橫向動作遊戲，所以用 Y 軸閃避效果會更好，但係閃避動作取決角色自身耐力限制，無得狂用。

遊戲中嘅武器種類有單手劍、雙刀、雙手大劍、錘、大斧，每種武器都有五把以上，攻擊範圍、速度、連擊數全部不同，特性亦有差異（如雙手大劍可打到 Y 軸上嘅敵人）。每把武器都會附加唔同技能（Buff 同 Debuff 都有，需要取捨），部份更會有屬性之分，而屬性喺呢隻遊戲入面都幾重要。例如冰屬敵人用火武器打會有雙倍傷害，冰武則傷害減半並不會進入冰凍狀態等，基本上係鼓厲玩家試唔同武器玩出自己風格。

武器有唔同技能，盾亦都會區分為可盾反及不能盾反兩種，一般黎講後者血量會較高並且可防禦包括儲力攻擊在內嘅所有攻擊，亦因為有呢個區分，所以用不能盾反類盾牌係必需配合單手武器，玩法就會出現巨大差異。我嘅玩法係姐姐用不能盾反盾牌配單手劍及回血甲，配件使用弓箭，打防禦為主戰法；弟弟就用回血雙手劍配回血配件打盾反入高速連技，互相配合。

危急時按 LB（L1）可立即切換角色，避免食一套大連技

單人遊玩有趣，雙人遊玩時玩法又會有所改變。所有敵人都有仇恨值，簡單講就係邊個打佢就追邊個，但係高難度下係會追追下轉目標的（攻擊頻率比起單打明顯地高）。所以雙打時玩法就會變成兩個玩家輪流吸仇恨、一人負責打小怪一人負責打王等，更高級嘅玩法就用武器配合打出更高傷害，例如 1P 使用火劍 2P 使用有「對燃燒中敵人暴擊」嘅武器，又或者一個用重武主力打出倒地大硬直一個用高攻擊力武器追加傷害等等，玩法自由度甚高。

最後講一講故事劇情，老實講劇情都係一般套路，無乜特別，但係過場嘅表現非常出色，特別係交待主要劇情既部分有多個分鏡，以唔同嘅角度製造氣氛，同一般橫向動作遊戲只係用對白交待可謂有天壤之別，相信大家開 Game 玩時都會感受到。

總結：

整款遊戲每個細節都做好好，特別係戰鬥系統設定細緻，真係好易令人上癮，但係要講缺點的話，佢都係有嘅。上面提及嘅劇情，編寫劇本果位人兄完全係浪費晒成隻 Game，優秀嘅過場配搭平平無奇嘅劇情，此為一大缺點；另一缺點係並無二週目要素，最高難度爆機後就無動力再開返黎玩，而最大嘅缺點就係無連線合作，如果有下集的話希望製作團隊會正視呢啲問題。

推薦度：★★★★☆ （無連線合作係一大缺點）

《雙子星：盛氣淩人》（Young Souls）已經推出，對應平台為 Xbox One、PS4、Nintendo Switch 及 PC Steam，支援繁體中文，同時已在 Xbox Game Pass 之列。